Aq úı Wall Street Journal-dy Tramptyń baspasóz pýlynan alyp tastady

ASTANA. KAZINFORM — Wall Street Journal AQSh prezıdenti Donald Tramptyń aldaǵy Shotlandııa saparyna arnalǵan baspasóz pýlynan shyǵaryldy, dep habarlaıdy CNN.  

— Ózgeris Wall Street Journal jarııalaǵan jalǵan jáne ar-namysty qorlaıtyn málimdemelerge baılanysty engizildi. Prezıdenttiń Shotlandııaǵa saparyn kórsetetin baspasóz pýlyna on úsh túrli BAQ qatysady, — dep málimdedi Aq úıdiń baspasóz hatshysy Kerolaın Levıtt basylymnyń Tramp pen Djeffrı Epshteın týraly jýyrdaǵy maqalasyna silteme jasap.

Donald Tramptyń Shotlandııaǵa sapary 25-29 shildege josparlanǵan.

Osy jyldyń basyna deıin pýldardy (aqparat taratatyn BAQ ókilderi toby) bólý isimen Aq úı tilshileriniń qaýymdastyǵy (WHCA) aınalysqan, bul baspasóz múddelerin qorǵaıtyn táýelsiz uıym. Alaıda aqpan aıynda Aq úı ákimshiligi bul protsesti óz baqylaýyna alyp, WHCA-nyń múmkindigin shektedi.

— Aq úıdiń oqıǵa týraly aqparatty taratýy unamaıtyn BAQ-ty jazalaýdyń bul áreketi qatty alańdatady jáne birinshi túzetýge qaıshy keledi. Úkimettiń aqparat agenttikterine olardyń habarynyń mazmunyna baılanysty kek alýy sóz bostandyǵy men táýelsiz BAQ-ty baǵalaıtyn kez kelgen adamdy alańdatýy kerek, — dedi WHCA prezıdenti Veıtszıa Tszıan.

Buǵan deıin AQSh prezıdenti Donald Tramp Wall Street Journal gazetiniń baspageri, medıamagnat Rýpert Merdokqa jáne jýrnalısterge Djeffrı Epshteınge arnalǵan ashyqhat týraly maqalaǵa baılanysty jala japqanyn aıtyp, sotqa berdi. Biraq málimdemede jýrnalıster avtory Tramp dep otyrǵan hat pen sýret jarııalanbaǵandyǵy aıtylǵan.