Aq úı Venesýeladaǵy kúshtik áreketterdiń úsh nusqasyn qarastyryp jatyr

ASTANA. KAZINFORM – Tramp ákimshiligi Bolıvarıan Respýblıkasynyń kóshbasshysy Nıkolas Madýrony bılikten taıdyrý úshin Venesýelada áskerı operatsııa júrgizýdiń úsh múmkin nusqasyn qarastyryp otyr, dep habarlaıdy TASS aqparat agenttigi.

The New York Times gazetiniń agenttikke habarlaýynsha, birinshi nusqa boıynsha Venesýela aýmaǵyndaǵy áskerı nysandarǵa áýeden soqqy berý josparlanyp otyr. Ondaǵy maqsat – qarýly kúshter tarapynan Madýrony qoldaýdy álsiretý.

Bul tásildi jaqtaýshylar áskerı ınfraqurylymdy nysanaǵa alý áskerlerdiń adaldyǵyna nuqsan keltirip, Venesýela kóshbasshysyn elden ketýge májbúr etýi múmkin dep sanaıdy.

Al qarsylastary áskerı shabýyldar qarýly kúshterdiń bóligin de, beıbit turǵyndardyń aıtarlyqtaı bóligin de Madýronyń aınalasyna biriktirip, qaqtyǵystyń boljanbaıtyn ýshyǵýyna ákelýi múmkin dep eskertti.

Gazet málimetinshe, ekinshi stsenarıı Venesýela prezıdentin tutqyndaý nemese óltirý úshin elıtalyq bólimshe – Áskerı-teńiz kúshteriniń arnaıy jasaǵyn ornalastyrýdy qamtıdy. Bul jospar memleket basshysyn tikeleı tutqyndaýǵa nemese joıýǵa baǵyttalǵan arnaıy kúshterdiń maqsatty operatsııasyn qamtıdy.

Úshinshi nusqa elge lańkestikke qarsy operatsııalarǵa mamandandyrylǵan, negizgi ınfraqurylym nysandaryn: áýejaılardy, munaı ken oryndaryn jáne basqa da strategııalyq mańyzdy kásiporyndardy basyp alý mindetin atqaratyn qaýipsizdik kúshterin engizýdi qamtıdy.

Eske sala ketsek, buǵan deıin Donald Tramp AQSh pen Venesýela arasynda soǵys bolýy ekitalaı ekenin jáne Nıkolas Madýronyń bul eldiń basshysy retinde sanaýly kúnderi qalǵanyn aıtty. 

Tramp suhbatynda Madýronyń qazirgi qyzmetinen jaqyn arada keteme degen suraqqa: «Men ıá dep aıtar edim. Iá, solaı dep oılaımyn», - dedi.

Qazan aıynyń sońynda AQSh eń iri áýe tasymaldaǵyshyn Venesýelaǵa jiberdi. https://kaz.inform.kz/news/aksh-en-r-aue-tasimaldagishin-venesuelaga-zhberd-546f9e/ AQSh qorǵanys vedomstvosynyń málimdemesinde áýe tasymaldaǵysh «transulttyq qylmystyq uıymdardy joıý jáne esirtki terrorızmine qarsy turý jónindegi prezıdenttiń bastamasyn qoldaý úshin» jiberilip jatqanyn málimdedi.

Venesýelanyń Qazaqstandaǵy Elshisi Kazinform agenttigine bergen suhbatynda AQSh shabýyldaǵan qaıyqtardyń esirtki kartelderine qatysy joq ekenin málimdedi.