Aq úı Ýkraına boıynsha beıbitshilik josparyna eleýli ózgerister engizgenin málimdedi

ASTANA. KAZINFORM — AQSh-tyń Ýkraına boıynsha beıbitshilik jospary aıtarlyqtaı ózgeristerge ushyrady. Bul týraly Aq úıdiń baspasóz hatshysy Kerolaın Levıtt málimdedi, dep habarlaıdy Kazinform. 

— Biz tarmaqtardy qaǵazǵa túsirdik. Bul tarmaqtar aıtarlyqtaı naqtylandy. Egjeı-tegjeıine keletin bolsaq, kelissóz júrgizýshilerdiń ózderi talqylaýyna múmkindik beremin. Jalpy alǵanda, kóńil-kúıimiz jaqsy, — dep málimdedi baspasóz hatshysy brıfıngte. 

Eske sala ketsek, 20 qarashada Tramptyń Ýkraınadaǵy beıbitshilik josparynyń barlyq 28 tarmaǵy jarııalandy.

Buǵan deıin Shveıtsarııada Ýkraına boıynsha kelissóz aıaqtalǵanyn jazǵan bolatynbyz. Jenevada Ýkraına tarapymen keńesterge AQSh Memlekettik hatshysy Marko Rýbıo qatysty.

Jenevada ótken kelissózden keıin Rýbıo Ýkraına sheneýnikterimen soǵysty toqtatý josparyn talqylaýda «aıtarlyqtaı ilgerileýshilik» bolǵanyn málimdedi. Memlekettik hatshynyń aıtýynsha, bul Donald Tramp ákimshiliginiń qańtarda bastalǵannan bergi Ýkraına tarapymen bolǵan eń nátıjeli kezdesýi boldy.

Reseı prezıdentiniń baspasóz hatshysy Dmıtrıı Peskov jýrnalısterge bergen suhbatynda Reseı prezıdenti Vladımır Pýtın men AQSh prezıdentiniń arnaıy ókili Stıven Ýıtkofftyń kezdesýi 2 jeltoqsan kúni ótetinin aıtty.