Aq úı Tramptyń Zelenskıı jáne EO kóshbasshylarymen kezdesý kestesin jarııalady

ASTANA. KAZINFORM — Donald Tramp pen Vladımır Zelenskııdiń kezdesýi búgin Astana ýaqytymen saǵat 22:15–te bastalyp, bir saǵatqa sozylady, dep habarlaıdy Kazinform. 

AQSh prezıdentiniń kúndelikti kestesin jarııalaıtyn Roll Call basylymynyń habarlaýynsha, osydan keıin Aq úı basshysynyń Eýropa elderi basshylarynyń qatysýymen kópjaqty kezdesýi bastalady. Ol 19 tamyzda Astana ýaqytymen 00:00–ge belgilengen.

Tramp pen Zelenskııdiń kezdesýi Reseı-Ýkraına qaqtyǵysyn retteýge arnalady.

Budan basqa, Aq úı basshysymen kópjaqty kezdesýge Ulybrıtanııa premer-mınıstri Kır Starmer, Frantsııa prezıdenti Emmanıýel Makron, Germanııa kantsleri Frıdrıh Merts, Italııa premer-mınıstri Djordja Melonı jáne Eýropalyq komıssııa tóraıymy Ýrsýla fon der Lıaıen qatysady.

— Erteń Aq úıde mańyzdy kún. Buryn-sońdy bir ýaqytta osynsha kóp eýropalyq kóshbasshy jınalǵan emes. Olardy qabyldaý men úshin úlken mártebe, — dep jazdy Tramp Truth Social-da.

17 tamyzda Vladımır Zelenskıı, Eýrokomıssııa basshysy, NATO bas hatshysy jáne eýropalyq kóshbasshylardyń qatysýymen beınekonferentsııa ótti.

Ulybrıtanııa úkimetiniń baspasóz qyzmeti taratqan málimdemege sáıkes, konferentsııa qorytyndysy boıynsha Batys elderiniń basshylary qaqtyǵys aıaqtalǵannan keıin Ýkraınada «qaýipsizdik kúshterin» ornalastyrýǵa, eldiń áýe jáne teńiz keńistigin qorǵaýdy qamtamasyz etýge jáne onyń qarýly kúshterin qalpyna keltirýge kómektesýge daıyn ekenin atap ótti. 

Buǵan deıin Zelenskıı Vashıngtonǵa attanǵanyn jazǵan bolatynbyz.