Aq úı Tramptyń qan aınalym júıesinde syrqat baryn rastady

ASTANA. KAZINFORM — AQSh prezıdenti Donald Tramp sozylmaly kóktamyr jetispeýshiligi dep atalatyn qan aýrýyna shaldyqqan, biraq onyń densaýlyǵy «óte jaqsy kúıde», dep habarlaıdy NPR agenttigi.  

Aq úıdiń baspasóz hatshysy Kerolaın Lıvıtt bul aýrý «ásirese 70 jastan asqan adamdar arasynda keń taraǵan dert» ekenin aıtty.

Aq úı 79 jastaǵy Tramp sońǵy aptalarda aıaǵyndaǵy «isinýden» keıin «keshendi tekserýden» ótkenin aıtty.

Dáriger Shon Barbabellanyń qyzmettik jazbasynda tereń kóktamyr trombozy nemese arterııalyq jetispeýshilik syndy anaǵurlym kúrdeli aýrý belgileri anyqtalmaǵany aıtylǵan.

Medıtsınalyq tekserý naqty qaı ýaqytta júrgizilgeni ázirge belgisiz.

Lıvıtt sonymen qatar prezıdenttiń jaqynda túsirilgen fotosýretterinde aıqyn kórinetin qoldaryndaǵy kógergen jerler «jıi qol alysý men júrek aýrýynyń aldyn alý úshin aspırın qabyldaýdan» týyndaǵan titirkenýdiń nátıjesi ekenin aıtty.

Jyl saıynǵy fızıkalyq tekserý nátıjesinde «onyń qan aınalym júıesi qalypty jaǵdaıda» ekeni, prezıdent júrek saýlyǵy úshin aspırın qabyldaıtyny jáne Tramptyń «densaýlyǵy óte jaqsy» ekeni aıtylǵan.

Sozylmaly kóktamyr jetispeýshiligi – bul aıaqtardan júrekke qaraı qannyń erkin aǵýyna kedergi keltiretin kóktamyrlardyń zaqymdalýynan týyndaıtyn aýrý. Saldarynan qan aıaqta jınalyp qalady, bul qysymnyń joǵarylaýyna, al emdelmegen jaǵdaıda kapıllıarlardyń jarylýyna alyp kelýi múmkin. Amerıkalyq tamyr hırýrgııasy qoǵamynyń málimetinshe, amerıkalyqtardyń 40%-y osy dıagnozdan zardap shegedi.

Buǵan deıin Kalıfornııanyń Joǵary jyldamdyqty temirjol basqarmasy San-Frantsısko men Los-Andjeles arasyndaǵy joǵary jyldamdyqty temirjol (JJM) jobasyn qarjylandyrýdan bas tartqany úshin Donald Tramp ákimshiligin sotqa berdi.