Aq úı Tramptyń AQSh-ty ondaǵan halyqaralyq uıymnan shyǵaryp jatqanyn málimdedi
ASTANA. KAZINFORM — AQSh prezıdenti Donald Tramp sársenbi kúni AQSh-tyń Birikken Ulttar Uıymyna kirmeıtin 35 halyqaralyq uıymnan, sondaı-aq AQSh-tyń ulttyq múddelerine qaıshy áreket etedi dep esepteletin BUU-nyń 31 qurylymynan shyǵýy týraly jarlyqqa qol qoıdy. Bul týraly Aq úıdiń málimdemesinde aıtyldy.
Bloomberg-tiń habarlaýynsha, Aq úı atalǵan uıymdardyń naqty ataýlaryn jarııalamady. Alaıda olardyń «radıkaldy klımattyq saıasatty, jahandyq basqarýdy jáne AQSh-tyń egemendigi men ekonomıkalyq qýatyna qaıshy keletin ıdeologııalyq baǵdarlamalardy alǵa tartyp otyrǵanyn» málimdedi.
Aq úıdiń málimdeýinshe, AQSh prezıdenti Donald Tramptyń halyqaralyq uıymdardan shyǵý týraly sheshimi eldiń syrtqy saıasatyn qaıta baǵdarlaý jáne ulttyq múddelerdi basym qoıý strategııasynyń bir bóligi bolyp otyr. Ákimshilik ókilderiniń aıtýynsha, bul qadam AQSh-tyń qarjylyq resýrstaryn tıimsiz jumsaýdy toqtatýǵa jáne eldiń egemen sheshim qabyldaý quqyǵyn kúsheıtýge baǵyttalǵan.
Málimdemede kórsetilgendeı, AQSh sońǵy jyldary kóptegen halyqaralyq qurylymǵa eleýli kólemde qarjy bólip kelgen, alaıda olardyń bir bóligi Vashıngtonnyń pikirinshe, AQSh-tyń strategııalyq, ekonomıkalyq jáne qaýipsizdik múddelerine saı kelmeıtin baǵytta jumys istegen. Osyǵan baılanysty prezıdent ákimshiligi bul uıymdardyń qyzmetin qaıta qarap, tıimsiz nemese ıdeologııalyq turǵydan birjaqty dep tanylǵan qurylymdardan shyǵý týraly sheshim qabyldaǵan.
Aq úı sondaı-aq keıbir halyqaralyq uıymdar klımattyq saıasat, áleýmettik jáne ıdeologııalyq bastamalar arqyly ulttyq úkimetterdiń ishki isterine yqpal etýge tyrysady dep esepteıtinin atap ótti. Bul, Tramp ákimshiliginiń kózqarasy boıynsha, AQSh Konstıtýtsııasyna, ulttyq egemendik qaǵıdattaryna jáne erkin naryq ekonomıkasyna qaıshy.
Buǵan qosa, AQSh bıligi halyqaralyq alańda ekijaqty jáne kópjaqty kelisimderdiń jańa, ıkemdirek formattaryna basymdyq berýdi kózdep otyr. Ákimshilik ókilderiniń aıtýynsha, Vashıngton óz múddesin tikeleı qorǵaı alatyn kelisimderge kóbirek mán beredi jáne AQSh-tyń sheshim qabyldaý erkindigin shekteıtin tetikterden bas tartýǵa nıetti.
Sarapshylardyń pikirinshe, bul sheshim AQSh pen onyń dástúrli odaqtastary arasyndaǵy qarym-qatynasqa áser etýi múmkin, sondaı-aq halyqaralyq uıymdardyń qarjylandyrý júıesine ózgerister engizýi yqtımal. Sonymen qatar keıbir elder AQSh-tyń bul qadamyn jahandyq basqarý júıesindegi róliniń álsireýi dep baǵalaýy múmkin.
Sonymen birge Tramp ákimshiligi AQSh halyqaralyq arenada tolyq oqshaýlanýdy kózdemeıtinin, kerisinshe óz sharttarymen jáne ulttyq múddege saı negizde yntymaqtastyq ornatýdy jalǵastyratynyn málimdep otyr.
Aıta keteıik, AQSh vızasyna ótinish beretin taǵy 25 eldiń azamattaryna kepildik jarna engizildi.