Aq úı: Tramp Rıýttemen AQSh-tyń NATO-dan shyǵý múmkindigin talqylaıdy
ASTANA. KAZINFORM – AQSh prezıdenti Donald Tramp NATO Bas hatshysy Mark Rıýttemen kezdesýde eldiń alıanstan shyǵý múmkindigin talqylaýy múmkin. Bul týraly Aq úıdiń baspasóz hatshysy Kerolaın Lıvıtt málimdedi, dep habarlaıdy DW.
Onyń aıtýynsha, Tramp Rıýttemen óte ashyq ári shynaıy áńgime ótkizýdi kózdep otyr.
Kerolaın Lıvıtt AQSh prezıdentiniń NATO odaqtastaryna qatysty synyn qaıtalap, alıans Irandaǵy soǵys bastalǵaly beri AQSh-tan syrt aınaldy dep baǵalady.
«Sońǵy alty aptada NATO Amerıka Qurama Shtattaryn qoldamady. Bul – alıanstyń osy synaqtan óte almaǵanyn kórsetedi», – dedi ol.
Aq úıdiń málimetinshe, Donald Tramp birneshe ret eýropalyq odaqtastardyń Ormýz buǵazyn qaıta ashý máselesinde AQSh-qa qoldaý kórsetkisi kelmeıtinine narazylyq bildirgen.
Buǵan deıin Donald Tramp pen AQSh memlekettik hatshysy Marko Rýbıo Irandaǵy soǵys aıaqtalǵannan keıin AQSh-tyń NATO-daǵy músheligin qaıta qaraý nıetin jarııalaǵan bolatyn.
Óz kezeginde Mark Rıýtte taraptardyń ustanymyn túsinetinin bildirip, Vashıngton men alıans músheleri arasynda deldal rólin atqaryp otyrǵany aıtyldy.
NATO ókiliniń málimetinshe, Tramp pen Rıýtte kezdesý barysynda qazirgi qaýipsizdik jaǵdaıyn, onyń ishinde Iran tóńiregindegi ahýaldy talqylaıdy.
Sondaı-aq taraptar qorǵanys ónerkásibi salasyndaǵy transatlantıkalyq yntymaqtastyqty nyǵaıtý máselesin de qarastyrady.
Aıta keteıik, buǵan deıin NATO bas hatshysy AQSh-qa resmı saparmen baratyny habarlandy.
