Aq Úı TikTok-ta resmı akkaýnt ashty

ASTANA. KAZINFORM — Aq Úı seısenbi kúni resmı TikTok akkaýntyn ashty. Bul AQSh prezıdenti Donald Tramp belgilegen merzim aıaqtalýǵa bir aıǵa da jetpegen ýaqytta boldy. Tramptyń talaptaryna sáıkes, bul qosymsha jańa ıesin tabýy nemese AQSh-ta tyıym salynýy tıis edi, dep jazady Sınhýa.

Sol kúni tústen keıin akkaýntta alǵashqy vıdeosy jarııalandy — 27 sekýndtyq rolıkte Donald Tramp serikterimen serýendep, 2016 jyly Respýblıkalyq partııanyń sezinde prezıdenttikke úmitker bolýǵa kelisim bergeni jaıly sózinen úzindi qoıylǵan.

Alǵashqy vıdeodan birneshe saǵat ishinde Aq Úıdiń akkaýnty 57 myńnan astam jazylýshyǵa ıe boldy. Buǵan deıin byltyr Donald Tramp óziniń prezıdenttik naýqany úshin ashqan TikTok akkaýntynda 15 mıllıonnan astam jazylýshy bar.

Tramp óziniń birinshi prezıdenttik merzimi kezinde TikTok-ty AQSh-ta tyıym salýǵa baǵyttalǵan jarlyqqa qol qoıdy. Jarlyqqa sáıkes, qosymshanyń ıesi — qytaılyq ByteDance kompanııasy AQSh-taǵy bıznesin jergilikti kompanııaǵa satýy tıis edi. Alaıda bul jarlyq sot sheshimderi sebepti kúshine enbedi.

Aq Úıge oralǵannan keıin Tramp 20 qańtar men 4 sáýirde ByteDance kompanııasyna sońǵy merzimdi eki ret 75 kúnge uzartty. 19 maýsymda ol taǵy bir ret TikTok-tyń AQSh-ta qyzmet etý merzimin 2025 jyldyń 17 qyrkúıegine deıin 90 kúnge uzartatyn jarlyqqa qol qoıdy.

Osyǵan deıin AQSh prezıdenti Donald Tramp dúısenbi kúni poshta arqyly daýys berý júıesine qarsy shyqty jáne bul tájirıbeden bas tartý úshin «qozǵalysqa bastamashy» bolatynyn málimdedi.