AQSh-ta shatdaýn búgin aıaqtala ma

ASTANA. KAZINFORM — Aq úı búgin AQSh tarıhyndaǵy eń uzaq shatdaýn aıaqtalýy múmkin dep úmittenedi. Prezıdent Donald Trampqa zań shyǵarýshylar qarjylandyrý týraly kelisimdi jiberýge daıyn, dep habarlaıdy ANEWZ.

AQSh-ta shatdaýnnyń bastalǵanyna 43 kún boldy.

— Aq úı respýblıkashyldardyń arqasynda búgin keshke shatdaýn aıaqtalady dep úmittenedi. Prezıdent Tramp bul daǵdarysty toqtatýdy asyǵa kútip otyr, — dedi Aq úıdiń baspasóz hatshysy Kerolın Lıvıtt.

Onyń aıtýynsha, Tramp zań jobasyna jýrnalıster aldynda qol qoıýy múmkin. 

Zań jobasy úkimetti 30 qańtarǵa deıin burynǵydaı qarjylandyrady. Sondaı-aq shatdaýn kezinde aqysyz demalysqa jiberilgen federaldy qyzmetkerler jumysqa qaıta oralady. 

Buǵan deıin AQSh-ta 2 500-den astam reıs keıinge qaldyrylǵany týraly jazdyq.