Aq úı Reseıdegi AQSh elshisine úmitkerin aıqyndady
ASTANA. QazAqparat - AQSh prezıdenti Barak Obamanyń ákimshiligi Reseıdegi AQSh elshisiniń úmitkerine belgili bir toqtamǵa keldi. RBK agenttiginiń habarlaýynsha, bul qyzmetke buryn Lıtvada, Grýzııada jáne Ýkraınada dıplomatııalyq qyzmetterdi basqarǵan kánigi dıplomat Djon Tefft laıyq dep tanyldy. Eger Aq úı Tefftini elshi laýazymyna usynatyn bolsa, onyń kandıdatýrasyn AQSh Kongresi bekitýi tıis.
RBK-nyń atap ótýinshe, budan birneshe aı buryn Aq úı Maıkl Makfoldy aýystyratyn adam izdegende Tefftiniń kandıdatýrasyna shúbalana qarady - amerıkandyq bıliktiń pikirinshe, Lıtva, Grýzııa jáne Ýkraına sııaqty elderde (ıaǵnı, 2000-jyldardyń ortasynda Reseımen qatynastarynda belgili bir problemalary bar elderde) jumys jasaǵan tájirıbesi bar elshini taǵaıyndaý Kremldi shamdandyrýy múmkin. Alaıda, reseı-amerıkan qatynastary ýkraın daǵdarysyna baılanysty shıelenisken kezde bul pikirler keıinge ysyryldy.
Djon Tefft dıplomatııalyq salada qyryq jyldan astam ýaqyt boıy qyzmet atqaryp keledi. 1980 jyldardyń sońynda - 1990 jyldardyń basynda ol KSRO-men qatynastarmen (keıinnen - Reseımen jáne TMD-men) aınalysatyn AQSh-tyń memlekettik departamentinde bólim basqardy, strategııalyq shabýyldaý qarýlary-І shartyn jasaý jónindegi kelissózderge qatysty. 1996-1999 jyldary Tefft Reseıde AQSh elshisiniń orynbasary mártebesinde jumys jasady. Budan keıin 10 jyldan astam ýaqyt boıy burynǵy keńestik elderde qyzmet atqardy - 2000-2003 jyldary Lıtvadaǵy dıplomatııalyq mıssııany basqardy, 2005-2009 jyldary - Grýzııa elshisi boldy, sol kezdegi grýzın prezıdenti Mıhaıl Saakashvılı Tefftiniń jumysyn erekshe baǵalady. Saakashvılıdyń aıtýynsha, Tbılısıdegi jumys jyldary kezinde Tefft «Grýzııa saıası jáne áleýmettik, mádenı ómiriniń bólshegine» aınaldy. Grýzııadaǵy jumys jyldarynda Tefft grýzın oppozıtsıonerleriniń áreketin ashyqtan-ashyq synady. Sodan keıin, 2009 jyly Ýkraınadaǵy arnaıy elshi boldy (bul laýazymdy 2013 jylǵa deıin atqardy).
Eske sala keteıik, Reseıdegi AQSh-tyń burynǵy elshisi Maıkl Makfol 2013 jyldyń aqpanynda óziniń otstavkaǵa ketetinin jarııalady. Ol óziniń bul tilegin otbasynyń qasynda kóbirek bolýy nıetimen túsindirdi.
