Aq úı óz saıtynyń dızaınyn ózgertti

ASTANA. KAZINFORM — Aq úıdiń veb-paraqshasy jańa prezıdent bılikke kelgennen keıin jańartyldy, dep habarlaıdy Kazinform menshikti tilshisi.

Endi onda Donald Tramptyń vıdeosy bar jáne Baıden ákimshiliginiń birqatar fýnktsııalary joq.

Tramp komandasy jańa ákimshilik saıtynyń dızaınyna aıtarlyqtaı ózgerister engizdi, onda Tramp prezıdenttiginiń birinshi merzimi kezindegi 30 sekýndtyq beıne montajy, áskerı sýretter men saılaýaldy naýqanyndaǵy sýretter bar.

Beınerolıkter Tramptyń Marine Force One kemesinen túskeni, jaqtastarymen sálemdeskeni, kameraǵa bas saýsaǵyn joǵary kóterip turǵany, áskerlerge áskerı sálem bergen jáne zań jobalaryna qol qoıǵany túsirilgen sátterden qurylǵan. Kadrlarda ushyp bara jatqan aq basty qyran, Aq úı, prezıdenttiń qalamy túsirilip, shabyttandyratyn mýzykamen súıemeldengen. 

— Aq úı. Prezıdent Donald Tramp, — dep jazylǵan beıne aıaqtalǵannan keıin jańa saıttyń uranynda.

Odan keıin paıdalanýshylar «Amerıka oraldy» degen jazý jáne Tramptyń sýreti bar jańa paraqshaǵa qaıta baǵyttalady. 

Aq úıdiń resmı saıtynda endi úsh negizgi paraqsha bar: jańalyqtar, ákimshilik jáne máseleler.

Sondaı-aq, Tramptyń basty basymdyqtary ınflıatsııany toqtatý, salyqty tómendetý, AQSh shekaralary qaýipsizdigin qamtamasyz etý, eldegi energııa óndirisin ulǵaıtý jáne qylmyspen kúresý ekeni habarlandy, dep jazdy Independent.

Endi ákimshiliktiń paraqshasynda Tramp, vıtse-prezıdent Dj.Dı Vens, birinshi hanym Melanııa Tramp jáne ekinshi hanym Ýsha Vens tanystyrylǵan. 

Aq úı saıtynyń Baıden ákimshiligi kezindegi birqatar fýnktsııalar joıyldy. Atap aıtqanda, tildi ıspan tiline ózgertý fýnktsııasy joq.

Eske sala keteıik, keshe Donald Trampty ulyqtaý rásimi boldy. 

Donald Tramp Vashıngtonda ótip jatqan ulyqtaý rásiminde sóz sóılep, Amerıkanyń altyn ǵasyry bastalǵanyn málimdedi. 

Sondaı-aq Tramp ınaýgýratsııadan keıin alǵashqy jarlyqtarǵa qol qoıǵanyn jazǵan bolatynbyz.