Aq úı ókilderi Túrkııadaǵy teraktilerdi aıyptady
ASTANA. QazAqparat - Aq úı ókilderi Túrkııada bolǵan jańa teraktilerdi aıyptaıdy, dedi Aq úıdiń Ulttyq qaýipsizdik keńesiniń ókili Ned Praıs. Bul týraly QazAqparat Rıa Novostı agenttigine silteme jasap habarlaıdy.
«Amerıka Qurama Shtattary búgin Túrkııanyń ońtústik-shyǵysyndaǵy ótkizý-baqylaý beketine jasalǵan shabýyldy qatań aıyptaıdy. Onyń saldarynan kóptegen adamdar mert boldy jáne olardyń arasynda beıbit turǵyndar da bar. Biz sonymen qatar, beısenbi kúni Stambýlda, polıtsııa bólimshesiniń aldynda bomba men mototsıkldi paıdalana otyryp jasalǵan teraktini de aıyptaımyz»,-dedi Praıs.
Ol sózinde polıtsııa bólimshesine jasalǵan teraktini Kúrdistannyń jumysshylar partııasy óz moınyna alǵandyǵyn habarlady. Onyń sózinshe, AQSh atalmysh toptyń zorlyq-zombylyq áreketterine alańdaýshylyq bildiredi jáne jarylystyń qurbany bolǵan azamattardyń otbasylaryna kóńil aıtady. «Vashıngton terrrorızmmen kúreste Túrkııany qoldaıdy,-dedi Parıs.
Aıta keteıik, Túrkııanyń ońtústik-shyǵysyndaǵy Hakkarı provıntsııasynda jol boıyndaǵy ótkizý-baqylaý beketinde bolǵan kóliktegi jarylystan 10 áskerı azamat pen 7 beıbit turǵyn qaza boldy.
Al, ótken beısenbi kúni Stambýlda Atatúrk halyqaralyq áýejaıynan jaqyn mańda jarylǵysh zat qoıylǵan mototsıkl jaryldy. Sońǵy málimetter boıynsha osy áreketten 10 adam zardap shekken.
