Aq úı Meta-ǵa qysym jasady - Mark Tsýkerberg

ASTANA. KAZINFORM – Meta tóraǵasy jáne bas dırektory Mark Tsýkerbergtiń málimdeýinshe, Baıden ákimshiligi onyń kompanııasyna qysym jasap, pandemııa kezinde Sovid-19 vırýsyna qatysty keıbir kontentke tsenzýra qoıýdy talap etken, dep habarlaıdy Financial Times.

Ókilder palatasy Zań komıtetiniń tóraǵasy Djım Djordanǵa joldaǵan hatynda Tsýkerberg Baıden ákimshiliginiń joǵary laýazymdy músheleri Meta komandasyna Covid-19-ǵa qatysty keıbir materıaldardy, sonyń ishinde ázil men satırany tsenzýralaý talabymen «birneshe ret qysym kórsetkenin» jazdy.

«Úkimet tarapynan jasalǵan qysym qate boldy dep esepteımin jáne bul týraly kesip aıtpaǵanymyzǵa ókinemin. Men kez kelgen ákimshiliktiń qysymymen kontent standarttarymyzdy buzbaýymyz kerek dep senemin, eger mundaı jaǵdaı qaıtalansa, biz qarsy turýǵa daıynbyz», - dep jazdy ol komıtettiń X áleýmettik jelisinde jarııalaǵan hatynda.

Tsýkerberg sonymen qatar óziniń Chan Zuckerberg Initiative uıymy arqyly saılaý ınfraqurylymyn qoldaýǵa jańa jarna qospaıtynyn rastady.

«Meniń maqsatym – beıtarap bolý jáne qandaı da bir ról oınamaý nemese tipti róldi oınap jatqandaı áser qaldyrmaý. Sondyqtan men osy saılaý tsıkline úles qosýdy josparlap otyrǵan joqpyn», - dep jazdy Tsýkerberg.

Bul Aq úıdiń aqparat taratý isine yqpal etýi jónindegi Tsýkerberg tarapynan jasalǵan kútpegen málimdeme boldy. Sondaı-aq qarashada ótetin saılaý aldynda demokrattarǵa jasalǵan eskertý bolatyn.

«Biz qaýipti pandemııamen betpe-bet kelgende bul ákimshilik qoǵam densaýlyǵy men qaýipsizdigin qoldap otyrdy. Bizdińshe, tehnologııalyq kompanııalar aqparat taratý boıynsha táýelsiz sheshim qabyldaǵanda ol sheshimniń saldary amerıka halqy úshin qandaı bolatynyn oılaný kerek»,-dep málimdedi dúısenbi kúni Aq úıdiń ókili.

Bul oqıǵa mıllıarder Ilon Masktyń platformalar sóz bostandyǵyna basymdyq berý kerek pa, álde onlaın qaýipsizdik mańyzdy ma degen saýalynan keıin bolyp jatyr.

Osyǵan deıin Ilon Masktiń Trampty qoldaýǵa aıyna 45 mıllıon dollar bergeli jatqanyn jazdyq.