Aq úı men Aqorda suhbaty Qazaqstannyń álemdegi ornyn aıqyndaı tústi — saıasattanýshy
ASTANA. KAZINFORM — Prezıdent Qasym-Jomart Toqaevtyń Nıý-Iorktegi sapary álemdik deńgeıdegi iri kompanııalardyń basshylarymen Qazaqstanda aýqymdy jobalardy iske asyrýdy kózdeıtin kelissóz júrgizdi. Saıasattanýshy Azamat Baıǵalıev bul sapar Qazaqstannyń álem saıasatynda orny nyǵaıyp kele jatqanymen baılanystyrady.
— Memleket basshysynyń Nıý-Iorktegi bıylǵy sapary kezdesýlerge baı bolyp jatyr. Bul Qazaqstannyń, Prezıdenttiń óziniń Eýrazııa aýmaǵynda róli nyǵaıyp kele jatqanyn kórsetedi. Osy tusta AQSh-taǵy elshiliktiń saparǵa tyńǵylyqty daıyndalyp, qyrýar sharýa atqarǵanyn erekshe atap ótý kerek. Chevron, ExxonMobil, Cameco, Amazon, Meta, Wabtec, Blackstone, Citigroup, Embraer, PepsiCo kompanııalarynyń basshylary Qazaqstan týynyń astynda ótken kelissózderge tartylýy úlken eńbekpen kelgen nátıje ekeni anyq. Іs júzinde ınvestorlar forýmy AQSh-ta kóshpeli otyrys ótkizdi dep sıpattaýǵa bolady, — deıdi halyqaralyq kommýnıkatsııa sarapshysy Azamat Baıǵalıev.
Saıasattanýshy Prezıdent Qasym-Jomart Toqaevtyń Donald Tramppen áńgimesine erekshe nazar aýdaryp otyr.
— Álemdik saıasattyń kil serkeleri AQSh-ta bas qosyp jatqanda mundaı kezdesý uıymdastyrý óte qıyn. Aq úıdiń ózi Qazaqstan basshylyǵymen jeke kezdesip jatqanda iri halyqaralyq kompanııalar da bul isten shet qalmaýy zańdylyq ispetti dúnıe. Eki el basshylarynyń kezdesýi Qazaqstan álemdik ortalyqtardyń bárimen — AQSh-pen de, Qytaımen de, eýropamen de, arab álemimen de birdeı baılanys ustaı beretinin kórsetti.
Jaǵymdy ınvestıtsııalyq sharttar men ózara tıimdi kelissózderdi Qazaqstan budan bylaı da qushaq jaıyp qarsy ala beretinin ańǵartty. Kelissózderdiń bári AQSh pen Qazaqstan arasyndaǵy strategııalyq seriktestikke tyń serpin beredi. Onyń ishinde energetıka, jańa tehnologııalar, qaýipsizdik salalary da bar. Al AQSh Prezıdenti Wabtec kompanııasymen arada jasalǵan $4,2 mlrd teńgeniń kelisimin qýattaıtynyn málim etti, — deıdi ol.
Taǵy bir saıasattanýshy Ǵazız Ábishev AQSh qazir de álemdik qarjy, saýda júıesin baqylaýynda ustap otyrǵanyn aıtady.
— Jetekshi tehnologııalardyń tizgini de AQSh-tyń qolynda. Sondyqtan Qazaqstannyń basqa memleketter sııaqty AQSh-pen tyǵyz baılanys ustanýy qalypty qadam. Qazaqstan shyn máninde ındýstrııalaný úshin sapaly ınvestıtsııany molynan tartý kerek. Elimiz beıbitshilikti tý etken saıasat ustanady. Batysqa qarsy urandardan ózin aýlaq ustap, ıadrolyq qarýǵa umtylyp otyrǵan joq. Munyń bári Qazaqstandy tartymdy ári senimdi áriptes etip tanytady, — deıdi saıasattanýshy.
Esik salsaq, memleket basshysy Qasym-Jomart Toqaev AQSh sapary aıasynda Prezıdent Donald Tramptan bólek, iri kompanııalardyń basshylaryn tarta otyryp, 20-dan astam kezdesý ótkizgen edi.