Aq úı mańyndaǵy qarýly shabýyl: kúdiktiniń kim ekeni belgili boldy
ASTANA. KAZINFORM — Vashıngtondaǵy Aq úı mańynda bolǵan atystan keıin qaza tapqan kúdiktiniń jeke bas deregi anyqtaldy. AQSh quqyq qorǵaý organdary onyń psıhıkalyq densaýlyǵyna qatysty máseleleri bolǵanyn málimdedi, dep habarlaıdy KAZINFORM agenttiginiń tilshisi.
Tergeý málimetine sáıkes, kúdikti — Merılend shtatyndaǵy Dandolk qalasynyń 21 jastaǵy turǵyny Nasır Best. Ol senbi kúni keshke Aq úıge jaqyn ornalasqan Qupııa qyzmettiń baqylaý beketine kelip, polıtseılerge oq atqan.
Oqıǵa Vashıngtonnyń soltústik-batys bóligindegi 17-kóshe men Pensılvanııa avenıýi qıylysynda bolǵan. Kýágerlerdiń aıtýynsha, birneshe sekýnd ishinde ondaǵan oq atylǵan.
Shabýyldan keıin Aq úı aýmaǵy ýaqytsha jabylyp, qaýipsizdik sharalary kúsheıtildi. Qarýly kúzet ǵımarattyń kireberisine qoıylǵan.
AQSh Qupııa qyzmetiniń habarlaýynsha, kúdikti oqıǵa kezinde jaralanyp, aýrýhanaǵa jetkizilgen. Keıin onyń kóz jumǵany belgili boldy.
Tergeý barysynda Nasır Bestiń buǵan deıin de Aq úı mańynda birneshe ret júrgeni anyqtalǵan. Ol baqylaý beketterinen ǵımaratqa qalaı kirýge bolatynyn surap júrgen kórinedi.
Sot qujattaryna sáıkes, kúdikti buǵan deıin zańsyz kirý áreketi úshin ustalǵan. Sol kezde ol ózin Isa paıǵambar dep tanystyryp, qamaýǵa alynǵysy keletinin aıtqan.
Sonymen qatar maýsym aıynda ol Aq úı aýmaǵyna kirmek bolǵan kóliktiń jolyn bógegeni úshin arnaıy medıtsınalyq mekemege jiberilgen.
Qazirgi ýaqytta oqıǵanyń naqty sebebi anyqtalyp jatyr. Tergeý jalǵasady.
Oqıǵa kezinde Aq úıde bolǵan AQSh prezıdenti Donald Tramp pen qaýipsizdik qyzmetkerleri zardap shekpegen.
Aıta ketsek, buǵan deıin AQSh Qupııa qyzmeti Aq úıge oq jaýdyrǵan adamdy mert qylǵanyn jazǵanbyz.
Kamıla Taıtóleý
