Aq úı Garvard ýnıversıtetiniń patentin alyp qoımaq

ASTANA. KAZINFORM – AQSh-tyń saýda mınıstri Lıýtnık Garvard ýnıversıtetin amerıkalyq salyq tóleýshiler aldyndaǵy mindeti men patent týraly zań talaptaryn oryndamaı otyr dep aıyptady. Oqý orny kemshilikti 5 qyrkúıekke deıin joıýy kerek, dep habarlaıdy DW.

Donald Tramptyń ákimshiligi Garvard ýnıversıtetine júzdegen mıllıon dollar turatyn patentin alyp qoıatynyn aıtyp, qorqytty. Buǵan federaldy zertteý granttary týraly zań talaptarynyń oryndalmaýy sebep bolyp otyr. Osy maǵynada 8 tamyz kúni jazylǵan jáne ýnıversıtet prezıdentine joldanǵan hatty AQSh-tyń saýda mınıstri Lıýtnık senbi kúni X áleýmettik jelisinde jarııalady.

Vedomstvo basshysynyń aıtýynsha, Garvard tarapynan Beıa-Doýl zańyn saqtaý boıynsha shuǵyl jáne jan-jaqty tekserý bastaldy. Ýnıversıtet 5 qyrkúıekke deıin amerıkalyq salyq tóleýshiler aldyndaǵy mindetin oryndaýy kerek. Olaı bolmaǵan jaǵdaıda Garvard ýnıversıtetiniń patenti úshinshi tulǵalarǵa berilip, daıyndaý kezinde zań buzylǵan ázirlemeler tárkilenedi.

Ýnıversıtetke qoıylyp otyrǵan talaptardyń ishinde ǵylymı jańalyqtar týraly ýaqytynda habar berip otyrý, óndiristi AQSh-ta ashýǵa basymdyq berý, ýnıversıtet ónimderin barynshy qoldanbaly etý úshin tıimdi sharalar qabyldaý bar.

Buǵan qosa ýnıversıtet 5 qyrkúıekke deıin federaldy bıýdjetten alynǵan barlyq patentterdiń tizimin jáne olardyń qalaı qoldanylyp jatqany, qandaı lıtsenzııalyq kelisimder bar, olar boıynsha kimmen birge jumys istep jatqany týraly aqparattardy kórsetý kerek.

Oqý ornynyń ókili Lıýtnıktiń talabyn Garvardqa, onyń quqyqtary men bostandyǵyna qarsy baǵyttalǵan dep atady. Ol sonymen qatar ýnıversıtettiń Beıa-Doýl zańdaryn tolyq oryndap, federaldy bıýdjet esebinen daıyndalǵan kóptegen ınnovatsııalardyń halyqqa qoljetimdi bolýy jáne ony paıdalana alýy úshin qoldan kelgenniń bárin jasap otyrǵanyn aıtty.

Osyǵan deıin Tramp ákimshiliginiń Garvardty sheteldik stýdentterdi oqytý quqyǵynan aıyrǵany týraly jazdyq.