Aq úı Djımmı Karterdiń qaıtys bolýyna baılanysty aza tutý kúnin jarııalady

ASTANA. KAZINFORM - Djo Baıden AQSh-tyń burynǵy 39-shy prezıdenti Djımmı Karterdiń qaıtys bolýyna baılanysty barlyq jerlerde Amerıka týyn 30 kún boıy jartylaı túsirýdi buıyrdy.

Aqúı málimdemesinde burynǵy prezıdent Djımmı Karterdiń qaıtys bolýyna baılanysty Djo Baıden AQSh-tyń shet elderdegi ókildikterinde, sonyń ishinde barlyq áskerı bólimshelerde, teńiz kemelerinde jáne bazalarda 30 kún boıy Amerıka týyn tómendetý týraly buıryq bergeni aıtylǵan.

Sondaı-aq, AQSh prezıdenti 2025 jyldyń 9 qańtaryn búkil Amerıka Qurama Shtattarynda ulttyq aza tutý kúni dep jarııalady.

- Prezıdent Karter minezdi, batyldyǵy men janashyrlyǵy bar adam boldy, onyń qyzmettegi ómiri ony bizdiń tarıhymyzdaǵy eń yqpaldy memleket qaıratkerleriniń birine aınaldyrdy. Dúnıe júzindegi beıbitshilik pen adam quqyqtary úshin kúresip, moraldyq tazalyǵy men jigerlendiretin kózqarasy ultymyzdy shabyttandyryp, álemimizdi ózgertken asyl kóshbasshy bola bildi, - dep atap ótti Djo Baıden málimdemesinde.

Djordjııa týmasy demokrat Dj. Karter 1976 jyly Ýotergeıt janjalynan keıin respýblıkashyl Djerald Fordty jeńip, AQSh prezıdenti bolyp saılandy. Dj. Karter 1908 jyly Ronald Reıganǵa jeńilgenge deıin

deıin bir prezıdenttik merzimde qyzmet etti.

Prezıdent bolǵannan keıin Dj. Karter qaqtyǵystardy beıbit jolmen sheshýge kómektesý jáne demokratııany, adam quqyqtaryn jáne áleýmettik ádilettilikti ilgeriletý jónindegi tynymsyz jumysy úshin, eń aldymen 1982 jyly Atlantadaǵy ýnıversıtetinde qurylǵan Karter ortalyǵy arqyly búkil álemge tanyldy.

Dj. Karter 2002 jyly «halyqaralyq qaqtyǵystardyń beıbit sheshimderin izdeýdegi ondaǵan jyldar boıǵy tynymsyz kúsh-jigeri úshin» jáne «adam quqyqtaryna degen adaldyǵy úshin» Nobel syılyǵymen marapattaldy.

Osyǵan deıin AQSh-tyń burynǵy prezıdenti Djımmı Karterdiń 100 jasynda ómirden ozǵany týraly jazdyq.