Aq úı BUU men NATO-ny qarjylandyrýdy toqtatýdy usyndy

ASTANA. KAZINFORM — Prezıdent Donald Tramptyń ákimshiligi AQSh Memlekettik departamentiniń bıýdjetin eki ese qysqartýdy, dıplomattar men elshilikter sanyn azaıtýdy, halyqaralyq uıymdardy, sonyń ishinde BUU men NATO-ny qarjylandyrýdy toqtatýdy usyndy, dep jazady DW.

Qarjylandyrýdy 50%-ǵa nemese shamamen 30 mıllıard dollarǵa qysqartý josparlanyp otyr.

Aq úı AQSh-tyń sheteldegi, negizinen Afrıka men Eýropadaǵy 10 elshiligi men 17 konsýldyǵyn jabýdy usynyp otyr. Qysqartýlar Memlekettik departamentke ǵana emes, fýnktsııalary syrtqy saıasat departamentine berilgen AQSh-tyń halyqaralyq damý agenttigine (USAID) de áser etedi.

Qujat BUU men NATO-ny qarjylandyrýdy toqtatýdy, sheteldik kómekti eki ese azaıtýdy jáne AQTQ, týberkýlez jáne bezgekpen kúresý úshin az mólsherdegi qarajatty qospaǵanda, shetelde densaýlyq saqtaý salasyn qarjylandyrýdy toqtatýdy talap etedi.

AQSh jyl saıyn Alıansqa eń kóp úles qosatyn memleketterdiń biri bolyp kelgen. Qarjyny qysqartý NATO-nyń qorǵanys strategııasyna áser etýi múmkin.

AQSh BUU-nyń beıbitshilik mıssııalaryna, gýmanıtarlyq kómek pen damý baǵdarlamalaryna turaqty túrde qarjy bólip kelgen. Bul sheshim álemdik gýmanıtarlyq operatsııalarǵa keri yqpal etýi yqtımal.

Halyqaralyq saıasattanýshylar bul qadam AQSh-tyń jahandyq kóshbasshylyq rólin álsiretýi múmkin dep esepteıdi. Sonymen qatar, odaqtastar arasynda alańdaýshylyq týyndap otyr.

AQSh bıligi bul sheshimdi ýaqytsha jáne jaǵdaıǵa qaraı qaıta qaralýy múmkin ekenin de málimdegen.

Aıta keteıik, buǵan deıin Tramp kompıýterlik chıpter men dári-dármekterge baj salyǵyn engizbekshi ekenin jazdyq.