Aq úı Ankorıdjdegi «qupııa qujattar» oqıǵasyna qatysty aıyptaýǵa jaýap berdi

ASTANA. KAZINFORM — Aq úı AQSh Ulttyq qoǵamdyq radıosynyń (NPR) Ankorıdjdegi qonaqúıde tabylǵan Memlekettik departamenttiń qujattary qaýipsizdik normalarynyń buzylýyna sebep boldy degen aıyptaýlaryn joqqa shyǵardy, dep habarlaıdy The Hill.

Aq úıdiń baspasóz hatshysynyń orynbasary Anna Kellı bul aıyptaýlardy joqqa shyǵardy.

«NPR-dyń birneshe bettik túski as mázirin jarııalap, ony „qaýipsizdik erejelerin buzý“ dep ataǵany kúlkili», — dedi ol.

Sonymen birge Kellıdiń aıtýynsha, mundaı «ózin-ózi jarııalaǵan jýrnalıstik tergeýlerge» eshkim senbeıdi.

«Prezıdent Donald Tramptyń sheshimimen olar endi salyq tóleýshiler qarjysyna da súıenbeıdi», — dep qosty ol.

Buǵan deıin NPR habarlaǵandaı, Tramp pen Pýtınniń Ankorıdjdegi Elmendorf-Rıchardson áskerı bazasynda ótken kezdesýi qarsańynda qonaqúı prınterinen segiz qujat tabylǵan. Olardyń ishinde sammıttiń baǵdarlamasy, kezdesýler ótetin oryndar týraly málimetter, sondaı-aq AQSh úkimetiniń úsh qyzmetkeriniń telefon nómirleri bolǵan.

Qujattyń alǵashqy betinde juma kúngi kezdesýlerdiń tártibi, onyń ishinde Tramptyń Pýtınge syılyq berýdi josparlap otyrǵany jazylǵan. Kelesi betterde amerıkalyq jáne reseılik joǵary laýazymdy tulǵalardyń esimderi kórsetilgen.

Al altynshy jáne jetinshi betterde qonaqtardyń otyrys syzbasy men túski as máziri berilgen.

NPR bul jaǵdaıdy «Tramp ákimshiligi sheneýnikteriniń qaýipsizdik normalaryn saqtaýdaǵy kezekti qateligi» dep baǵalady.

Eske sala keteıik, 15 tamyzda Ankorıdjdegi Elmendorf-Rıchardson áskerı bazasynda Vladımır Pýtın men Donald Tramptyń kezdesýi ótti.