Aq úı 2027 jylǵy qorǵanysqa rekordtyq 1,5 trln dollar surady — BAQ
ASTANA. KAZINFORM — Aq úı 4 sáýirde Kongresten 2027 jylǵa qorǵanysqa shamamen 1,5 trln dollar bólýin surady. Bul AQSh tarıhyndaǵy eń joǵary soma sanalady, dep habarlaıdy Kazinform agenttiginiń Vashıngtondaǵy menshikti tilshisi.
Donald Tramptyń jańa bıýdjeti aıasynda usynylǵan bul suranys Pentagon shyǵyndaryn aǵymdaǵy qarjy jylyna qaraǵanda shamamen 40%-ǵa kóbeıtýdi kózdeıdi.
Qorǵanysqa shyǵynnyń ulǵaıýy áskerı qyzmetkerlerdiń jalaqysyn 5–7%-ǵa kóterýge, jańa kemeler salýǵa 65,8 mlrd dollar bólýge jáne Iranmen soǵys kezinde taýsylǵan mańyzdy oq-dáriler qoryn tolyqtyrýǵa múmkindik beredi. Sondaı-aq bul «Altyn kúmbez» — zymyranǵa qarsy qorǵanysqa arnalǵan ǵaryshtyq datchıkter men júıesin salýǵa qoldaý kórsetýdi qamtıdy, dep habarlaıdy CBS News.
Usynylyp otyrǵan bıýdjettiń edáýir ulǵaıýy Tramp ákimshiligi tıimsiz dep esepteıtin ishki baǵdarlamalardy kúrt qysqartý arqyly ishinara óteledi, dep jazady The New York Times.
Tramp ákimshiligi kóptegen ishki vedomstvolardyń qarjylandyrýyn 73 mlrd dollar nemese 10%-ǵa qysqartýdy usyndy, onyń ishinde densaýlyq saqtaý, turǵyn úı qurylysy jáne bilim berý salasyndaǵy negizgi federaldyq baǵdarlamalardan bas tartý qarastyrylǵan, olardyń keıbiri azshylyqtarǵa jáne turmysy tómen toptarǵa baǵyttalǵan.
Bul somany bólý AQSh-tyń onsyz da qomaqty memlekettik qaryzyn arttyrýy múmkin, ol 3 sáýirdegi jaǵdaı boıynsha 39 trln dollardy quraıdy.
Bıýdjet jospary jarııalanar aldynda prezıdent pen onyń kómekshileri qorǵanysqa shyǵyndy ulǵaıtý tótenshe qajet ekenin málimdedi. Olar muny Iranmen jalǵasyp jatqan soǵysqa baılanysty oq-dári men basqa da materıaldardy tolyqtyrý qajettiligimen túsindirdi.
Budan buryn NATO bas hatshysy AQSh-qa resmı saparmen baratynyn jazǵan bolatynbyz.
