Aq tútek boranda jolda qalǵan azamatty qutqaryp qalǵan aýyl ákimi marapattaldy
ORAL. KAZINFORM – Batys Qazaqstan oblysy Syrym aýdany Josaly aýyldyq okrýginiń ákimi Batyrǵalı Imanqulov Memlekettik qyzmet isteri agenttiginiń tóraǵasy Darhan Jazyqbaıdyń alǵys hatymen marapattaldy.
Agenttik Tóraǵasy tabıǵat synaqtar tusynda qıyndyqqa tap bolǵan qoǵam múshelerine memlekettik qyzmetshi retinde qoldaý kórsetip, azamattyq ustanym jáne batyl is-qımyl tanytqany úshin alǵys bildirdi.
Batyrǵalı Imanqulov bıyl 6 aqpannan 7 aqpanǵa qaraǵan túni aq tútek boranda traktormen qar qursaýynda qalyp, aýylǵa qaraı jaıaý shyǵyp baǵytynan jańylysyp qalǵan azamatqa dereý kómekke baryp, aýylǵa aman-esen jetkizgen. Memlekettik qyzmetshiniń erliginiń arqasynda azamatqa ýaqytyly kómek kórsetildi.
«Agenttik tóraǵasynyń arnaıy joldaǵan alǵys hatyn Batys Qazaqstan oblysy boıynsha aýmaqtyq departamentiniń basshysy, Ádep jónindegi keńes tóraǵasy Murat Baısalov tabystady», - delingen habarlamada.
