Aq Nilde birneshe júzdegen ońtústiksýdandyqtar aǵyp ketti
ASTANA. 14 qańtar. QazAqparat - Ońtústik Sýdandaǵy Aq Nil ózeninde saldyń sýǵa ketýi saldarynan jalpy sany 200-300 adam shamasynda opat boldy. Qaza bolǵandardyń arasynda áıelder men balalar da kóptep sanalady. Bul týraly Agence France-Presse habarlaıdy.
Salǵa naqty ne bolǵany jáne onda qansha adam bolǵany ázirge belgisiz. Boljam boıynsha, salǵa óte kóp adam otyryp alǵandyqtan, artyq salmaqty kótere almaı batyp ketýi múmkin.
Sýǵa ketkenderdiń barlyǵy - Ońtústik Sýdannyń Malakal qalasynyń turǵyndary. Olar sol qalada úkimet áskerleri men burynǵy vıtse-prezıdent Rıek Machardyń jaqtastary arasynda bolyp jatqan qarýly qaqtyǵystan qashyp shyqqan eken.
Esterińizge sala keteıik, Ońtústik Sýdandaǵy qaqtyǵys 2013 jyldyń jeltoqsanynyń orta sheninen beri jalǵasyp jatyr. Osy ýaqyt arasynda bul elden qashqan bosqyndardyń sany 50 myńnan asyp ketti. Olardyń kópshiligi kórshi Ýgandaǵa bas saýǵalaǵan. Al qaqtyǵys qurbandarynyń sany myńnan asty.
