Aq qardyń ústimen shańǵy tepkenge ne jetsin - múgedek sportshy
ORAL. QazAqparat - Aq qardyń ústimen shańǵy tepkenge ne jetsin! Bul týraly búgin Oral qalasynda shańǵymen kópshilik júgirý sharasyna qatysqan múgedek sportshy Baýyrjan Ómirálıev málim etti, dep habarlaıdy QazAqparat tilshisi.
Qalalyq mádenıet jáne demalys saıabaǵynda jańa jyl aldyndaǵy shańǵymen kópshilik júgirý saıysyna 500-den astam turǵyn qatysty.
Solardyń arasynda qos aıaǵy joq bolsa da, jarys jolyna shyqqan Baýyrjan erekshe nazar aýdardy. Ol keıbireýlerdeı orta jolda qalyp qoıǵan joq. Deni saý sportshylarmen birge 2,7 km qashyqtyqty tolyq aıaqtap shyqty.
«Men 2017 jyldyń 9 qarashasy kúni jol apatyna ushyrap, qıyn jaǵdaıǵa tap boldym. Qos aıaǵymnan aıyrylyp, úıde jattym. Sol kezde qanshama qıyn bolsa da, ómirge degen qushtarlyǵymnan aınymaı, sportpen aınalysýǵa bel býdym. Maǵan jeke bapkerim Azon Nurmuhanuly Shaımardanov dem berip, sheberligimdi shyńdap keledi. Jarty jyldan beri voleıbol, hokkeı, shańǵymen júgirý syndy sport túrlerimen turaqty shuǵyldanýdamyn. Sondyqtan barsha turǵyndardy kele jatqan jańa jylmen quttyqtap, sportpen aınalysýǵa shaqyramyn», dedi QazAqparat tilshisine 29 jasar Baýyrjan Ómirálıev.
Aıta keteıik, sonymen qatar búgin 42 adam 10 km jáne 11 adam 21 km qashyqtyqty (jartylaı marafon) jaıaý júgirip ótti.
