«Aq bulaq»: Qostanaı oblysyndaǵy shalǵaı aýyldarǵa aýyz sý jetti
QOSTANAI. QazAqparat - Qostanaı oblysy Amangeldi aýdanynyń aýyldaryna aýyz sý qurylǵylary ornatyldy, dep habarlaıdy QazAqparat.
Qostanaı oblysynyń ortalyǵynan 450 shaqyrym qashyqtyqta ornalasqan Amangeldi aýdanynda memlekettik baǵdarlamalar jemisti júzege asyp keledi. Mundaǵy Amantoǵaı jáne Jaldama aýyldaryna ortalyqtandyrylǵan taza aýyz sý qubyry keldi. Buryn osyndaǵy Keńes Odaǵy kezinde salynǵan sý qubyrynyń ábden tozyǵy jetken-di.
Sý tartqyshty Arqalyq qalasyndaǵy «Allıýmınstroı» jaýapkershiligi shekteýli seriktestigi tartty. Qurylys jumystaryna bir jylǵa jýyq ýaqyt jumsaldy. Joba eldi mekenderdi sapaly aýyz sýmen qamtamasyz etý maqsatynda 2011-2020 jyldarǵa arnalǵan «Aq bulaq» baǵdarlamasy aıasynda júzege asyryldy, quny - 480 mln teńge. Qurylys-montaj jumystaryna respýblıkalyq bıýdjetten 432 mln 714 myń teńge, oblystyq bıýdjetten 48 mln 79 myń teńge qarajat bólindi. Júrgizilgen qubyrdyń uzyndyǵy - 22 shaqyrym.
Amangeldi aýdanynyń qurylǵanyna 90 jyl tolýy mereıli merekesi kezinde ortalyqtandyrylǵan sý qubyry saltanatty túrde ashyldy. Oblys ákimi Arhımed Muhambetov bul jumystyń, sý tartqysh qurylǵylardyń óte sapaly jasalǵanyn aıtty.
«Eldi mekender úshin aýyz sý máselesi óte mańyzdy. Elbasy tapsyrmasymen aýyldardy aýyz sýmen qamtamasyz etý isi atqarylyp keledi. Sapaly atqarylǵan jumysy úshin merdiger uıymǵa rızashylyǵymdy bildiremin. Jalpy, Amangeldi, Esir, Amantoǵaı jáne Úrpek aýyldaryna sý qubyryn tartý úshin 2 mıllıard teńge bóldik. Jol da salyndy, aýyz sý bar, 15 qazan kúni Arqalyqta et kombınaty ashylady. Munyń barlyǵy aýyl turǵyndary úshin. Atqarýshy bılik organdary shalǵaı aýyldardyń jaǵdaıyn únemi nazarda ustaıdy», - dedi Arhımed Muhambetov.
Amantoǵaı aýyldyq okrýgi ákimi Jumanııaz Іlııasovtyń sózinshe, eski qubyr kezinde turǵyndar kúnine bir-bir jarym saǵat qana sý alatyn, endi úıge táýlik boıy móldir sý kelip tur.
«Aýyz sýdyń sapasyna bas mán berildi. Qurylǵylar avtomattandyrylǵan. Sý ótkizgishter de búgingi kúnniń talaptaryna jaýap beredi. Sý sorǵysh qurylǵynyń uzyndyǵy 1,6 shaqyrym. Sý bar, jol salyndy. Osy jańalyqtardy estip, aýylymyzǵa kóship kelýshilerdiń qatary kóbeıe bastady», - dedi aýyl ákimi.
Zamanaýı sý tartqysh 238 úıdi, 9 nysandy aýyz sýmen qamtamasyz etýge qaýqarly.
Eske salsaq, Amantoǵaı jáne Jaldama aýyldarynyń irgesinen ótetin «Arqalyq-Torǵaı» tas jolynyń jóndelýi aıaqtalýǵa jaqyn.
