«Aq bulaq» baǵdarlamasy aıasynda jyl sońyna deıin 300 joba iske asýy qajet
ASTANA. 23 shilde. QazAqparat - «Aq bulaq» baǵdarlamasy sheńberinde 2013 jyly 78,1 mlrd. teńgege 300 jobany iske asyrý qajet.
Bul týraly búgin ótken Úkimet otyrysynda Ekonomıka jáne bıýdjettik josparlaý mınıstri Erbolat Dosaev málim etti.
Mınıstrdiń sózine qaraǵanda, birinshi jartyjyldyqta qalalyq sýmen jabdyqtaý jáne sý burý boıynsha qarajattardy ıgerý 76,1 paıyzdy qurap otyr. Bul rette qarajattyń eń tómen ıgerilýi Mańǵystaý (15,3%), Aqmola (53,9%) jáne Qostanaı (56,8%) oblystarynda baıqalǵan. Al selolyq sýmen jabdyqtaý boıynsha ıgerý 93,5 paıyzdy quraǵan.
«Budan bólek, óńirlerdiń jáne tutastaı el ekonomıkasynyń ósýine jergilikti ózin-ózi basqarýdy qarjylyq qoldaý jaqsy serpin berýi qajet. Osy maqsattarǵa jobalardy iske asyrý úshin 2100 eldi mekende bilim berý, densaýlyq saqtaý, mádenıet, sport, sýmen jabdyqtaý, gazben jabdyqtaý, kommýnaldyq sharýashylyq nysandaryn kúrdeli jáne aǵymdaǵy jóndeý boıynsha 2013 jyly respýblıkalyq bıýdjetten 6 mlrd. teńge somasynda qarajat bólindi», - deıdi mınıstr.
