«Aq bıdaı - 2017» spartakıadasynyń jeńimpazdary 300 myń teńgeniń sertıfıkatyna ıe boldy
KÓKShETAÝ. QazAqparat - Aqmola oblysynyń Jarqaıyń aýdanynda ótken «Aq bıdaı - 2017» 30-shy oblystyq jazǵy spartakıadasy márege jetti, dep habarlaıdy QazAqparat tilshisi.
Úsh kúnge sozylǵan jarys erler men áıelder arasynda ótken voleıbol, basketbol, fýtbol oıyndarynan jáne ústel tennısi, shahmat, doıby, jeńil atletıka, sporttyq týrızm, prezıdenttik kópsaıys, otbasylyq starttar sekildi sport oıyndarynyń toǵyz túrinen ótti.
«Jastar» stadıonda ótken jeńil atletıka men otbasylyq starttar kórermenderdiń kóńilinen shyqty. 800 metrlik qashyqtyqqa júgirýden Alına Battyrdınova, 100 metr qashyqtyqta ıÝlııa Syromıajko, osy qashyqtyq boıynsha erlerden Dmıtrıı Savon, uzyndyqqa sekirýden Anel Berikjanova syndy jetkinshekter qarsylastaryna des bermedi.
Jalpykomandalyq esepte qalalar arasynda Kókshetaý qalasy birinshi oryndy ıelenip, 300 myń teńgeniń sertıfıkatyn utyp aldy. Ekinshi oryn jáne 200 myń teńgeniń sertıfıkaty Şýchınsk qalasynyń enshisine buıyrdy. Úshinshi oryndy Atbasar qalasy ıelenip, olar 100 myń teńge aldy. Dál osyndaı syılyqtar aýdandar arasynda úlestirilip, birinshi oryndy Jarqaıyń aýdany, ekinshi jáne úshinshi oryndardy Zerendi jáne Shortandy aýdandary bólisti.
