Aq bas sıyr men baıystyń izbasarlary qaıda – AShM jaýaby

ASTANA. KAZINFORM – Mal tuqymyn asyldandyrý degende oıǵa qazaqtyń aq bas sıyry, edilbaı men baıys qoıy ǵana keledi. Onyń bári Keńes zamanyndaǵy ǵylymnyń jetistigi deýge bolady. Táýelsizdik jyldarynda nege tól tuqym dep aıtýǵa turatyn jańa mal násili paıda bolǵan joq? Aýyl sharýashylyǵy mınıstrligi Kazinform saýalyna jaýap joldady.

- 2021-2023 jyldarǵa mal sharýashylyǵyndaǵy ǵylymı baǵdarlamalardy qarjylandyrý aıasynda kóptegen ǵylymı jumys júrgizilgen. Atap aıtsaq, Qazaq mal sharýashylyǵy jáne jemshóp óndirý ǵylymı-zertteý ınstıtýty «Qazaqtyń jylqysynyń adaı tıpi «Rattory-60» zaýyttyq aıǵyrynyń atalyq jelisin shyǵarý boıynsha jumystar júrgizdi. Sonyń nátıjesinde 2023 jylǵy 29 jeltoqsanda QR Ádilet mınıstrligi janyndaǵy Ulttyq zııatkerlik menshik ınstıtýty «Adaı» jylqy tuqymyna patent berdi. Osylaısha, adaı jylqylary resmı túrde derbes tuqym retinde tanylyp, QR selektsııalyq jetistikteriniń memlekettik tiziliminde tirkeldi, - dep jazylǵan jaýapta.

Resmı málimette aýyl sharýashylyǵy salasyndaǵy ǵylymdy damytý úshin úsh jylǵa 7 mlrd teńgege jýyq qarjy qarastyrylǵany aıtylǵan.

- Qazirgi tańda mınıstrlik «Ǵylymı zertteýlerdi jáne is-sharalardy baǵdarlamalyq-nysanaly qarjylandyrý» baǵdarlamasy boıynsha 2024-2026 jyldarǵa mal sharýashylyǵyndaǵy ǵylymı baǵdarlamalardy qarjylandyrýǵa 6,9 mlrd teńge qarastyryp, konkýrstyq protsedýralar ótkizilip jatyr. Atalǵan qarjy mal sharýashylyǵynyń barlyq baǵyttaryna bólinip otyr, - delingen resmı jaýapta.

Eske salsaq, adaı tuqymdy qazaq jylqysynyń erekshe qasıetteri 2024 jyldyń basynda zańdy túrde bekitilgen bolatyn.