Azıada: Qytaı quramasy sapynda 4 qazaq sportshysy óner kórsetedi

ASTANA. KAZINFORM – IX qysqy Azııa oıyndaryna qatysatyn Qytaı ulttyq quramasy sportshylarynyń tizimi jarııalandy.

Sınhýa agenttiginiń jazýynsha, Harbın qysqy Azııa oıyndary Qytaı sport delegatsııasynyń quramynda 257 adam bar, onyń ishinde 170 sportshy (85 er jáne 85 áıel).

Olardyń qatarynda 6 olımpıada chempıony bar. 147 sportshy Qysqy Azııa oıyndaryna alǵash ret qatysyp otyr. Sondaı-aq, buǵan deıin 23 sportshy qysqy Azııa oıyndaryna, al 48 sportshy Beıjiń qysqy Olımpıada oıyndaryna qatysqan.

Qytaı quramasynyń sapynda ulty qazaq 4 sportshy IX qysqy Azııa oıyndaryna qatysady. Olar: Aqnar Adaqqyzy (konkımen júgirý), Qanaǵat Muhameduly (konkımen júgirý), Baıan Jalynqyzy (Shańǵy) jáne Samǵar Serikuly (Shańǵy).

Eske salsaq, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady.

QR Týrızm jáne sport mınıstrliginiń habarlaýynsha, Qazaqstannan 139 sportshy el namysyn qorǵaıdy.

Osyǵan deıin qysqy Azııa oıyndary bıletteri resmı satylymǵa shyqqanyn jáne alaý estafetasy bastalǵanyn jazǵan edik.