Aq Azıada: qazaqstandyq mánerlep syrǵanaýshylar altyn medal ala ala ma
ASTANA. KAZINFORM - 2025 jyly Qytaıdyń Harbın qalasynda ótetin Qysqy Azııa oıyndaryna daıyndyq barysynda Qazaqstannyń mánerlep syrǵanaýshylary birqatar tabysqa qol jetkizip, medal utyp alýǵa degen múmkindikterin kórsetti. Bul týraly Ulttyq olımpıadalyq komıtet málim etti.
Aldaǵy Azııa oıyndarynda Qazaqstan quramasynyń sportshylary mánerlep syrǵanaýdan úsh baǵdarlama boıynsha óner kórsetedi.
Erler arasyndaǵy jekeleı synda qurlyq úzdigi ataný úshin Mıhaıl Shaıdorov pen Dıas Jırenbaev baq synaıdy. Áıelder arasyndaǵy baǵdarlamada Sofıa Samodelkına men Sofıa Farafonova jarysqa qatysady. Al Rahat Bralın men Anna Levkovets qosalqy quramda.
Sondaı-aq, Qazaqstan quramasynyń bapkerler shtaby muz ústindegi bı jarysynda Gaýhar Naýryzova men Baısanǵur Datıevtiń óner kórsetetinin málimdegen.
Qazaqstannyń mánerlep syrǵanaýshylarynyń qazirgi jaǵdaıy men jetistikterine qarap, Azııa oıyndarynda medal utyp alýǵa múmkindikteri bar ekenin aıtýǵa bolady. Ásirese, Shaıdorov pen Samodelkınanyń kórsetkishteri senim artýǵa negiz beredi.
2024 jyldyń jeltoqsan aıynda Shaıdorov ISU Gran-prı fınalyna ótken alǵashqy qazaqstandyq atandy. Bul jarysta ol 253,75 upaı jınap, besinshi orynǵa turaqtady. Al 2025 jyly Italııanyń Týrın qalasynda ótken Ýnıversıadada ol óz nátıjesin jaqsartyp, 260,15 upaı jınady jáne qola júldeden bir qadam qalys qaldy.
Budan bólek, Mıhaıl Shaıdorov mánerlep syrǵanaýdyń álemdik tarıhyna esimin jazdy. Frantsııanyń Anje qalasynda ótken Gran-prı kezeńinde ol úshtik aksel men tórttik týlýpty kombınatsııa retinde taza oryndaǵan alǵashqy sportshy boldy. Buryn-sońdy eshkim mundaı kombınatsııany resmı jarystarda oryndaı almaǵan.
Degenmen, Harbındegi Azııa oıyndarynda altyn medal alý ońaıǵa soqpaıdy. Azııanyń mánerlep syrǵanaýshylary, ásirese japondyqtar, álemdik jarystar men Olımpıada oıyndarynda turaqty túrde jeńis tuǵyrynan kórinip júr.
Shaıdorov qysqa baǵdarlamada básekelesterine laıyqty qarsylyq kórsete alady. Degenmen erkin baǵdarlamada az upaı jınap qalýy yqtımal. Bul oǵan azııalyq kóshbasshylardy jalpy esepte basyp ozýǵa múmkindik bermeıdi.
Japonııa quramasynan ıÝma Kagııama men Shýn Sato erekshe kózge túsedi. Ekeýi de Gran-prı fınalynda jáne Ýnıversıadada óner kórsetken.
Kagııama 2023 jylǵy álem chempıonatynyń jáne Olımpıadanyń kúmis júldegeri. Ol Frantsııanyń Grenobl qalasyndaǵy Gran-prı fınalynda 281,78 upaımen ekinshi oryndy ıelense, Shýn Sato 270,82 upaımen úshinshi oryn aldy. Týrındegi Ýnıversıadada ıÝma jeńimpaz atanyp, 289,04 upaı jınady, al Shýn birneshe qatelik jiberip, 248,50 upaımen besinshi orynǵa turaqtady.
Sonymen qatar Ońtústik Koreıanyń sportshysy Cha Djýnhvan Ýnıversıadada qazaqstandyq Shaıdorovty basyp ozyp, 264,94 upaımen qola júldeger atandy. Sondaı-aq, Cha 2023 jyly álem chempıonatynda 296,03 upaı jınap, kúmis júlde jeńip aldy. Osylaısha Ońtústik Koreıa sportshysy Harbındegi Azııa oıyndarynda basty favorıtterdiń qataryna kiredi.
Sonymen qatar erler arasyndaǵy jarystarda Japonııa bapkerleriniń quram tańdaý jónindegi sheshimi áli belgisiz bolyp otyr. Japonııada myqty sportshylar kóp. Olardyń qatarynda Kao Mıýra, Tatsýıa Tsýboı jáne basqalar bar.
Qytaıdyń mánerlep syrǵanaýshylaryna kelsek, bul sport túrinde olardyń deńgeıi ázirge joǵary emes. Olar óz jerinde ótetin Azııa oıyndarynda belgili bir nátıjeler kórsetýi múmkin, biraq altyn medal úshin kúrese alady dep aıtý qıyn.
Dıas Jırenbaevqa kelsek, onyń múmkindikteri shekteýli. Týrındegi Ýnıversıadada ol 186,09 upaımen 14-oryn aldy. 2024 jyly Qazaqstan chempıonatynda 200,63 upaı jınap jeńimpaz atanǵanymen, bul kórsetkish Azııa oıyndarynda kóshbasshylarmen básekelesýge jetkiliksiz.
Áıelder arasyndaǵy jarysta Japonııa jáne Ońtústik Koreıa mánerlep syrǵanaýshylary kósh bastap tur. Qazaqstandyq Sofıa Samodelkına minsiz óner kórsetken jaǵdaıda júldege úmitker bola alady. Biraq ol halyqaralyq eresekter deńgeıinde jarysqa endi ǵana qatysa bastaǵanyn eskersek, bul ońaı bolmaıdy.
Jasóspirimder arasyndaǵy jarystarda ol joǵary nátıjelerge qol jetkizgen. Mysaly, 2021 jyly jasóspirimder arasyndaǵy Gran-prıde ekinshi oryn aldy. Al bıylǵy Ýnıversıadada 190,96 upaımen qola júldege ıe boldy. Eger Samodelkına óz nátıjesin jaqsartsa, Harbınde 200 upaıǵa jaqyndaýy múmkin.
Eger Gran-prı nátıjelerin eskeretin bolsaq, fınaldyq kezeńge shyqqan alty sportshynyń beseýi Japonııa atynan óner kórsetkenin atap ótý qajet. Olardyń qatarynda álem chempıony, Olımpıada oıyndarynyń qola júldegeri Kaorı Sakamoto jáne 2025 jylǵy Ýnıversıadanyń kúmis júldegeri Mone Tıba bar (Sózge tıek etsek, Týrınde onyń komandalasy Rıon Sýmıesı jeńiske jetti). Erler sekildi, bul eldiń áıelder quramasy da myqty rezervke ıe.
Japondyqtarmen básekege túse alatyn sportshy – Ońtústik Koreıa ókili Kım Chheen. Ótken jyly ol álem chempıonatynda úshinshi oryndy (203,59 upaı) jáne Tórt qurlyq chempıonatynda ekinshi oryndy ıelengen. Bıylǵy maýsymda Gran-prı serııasy kezeńderinde sátti óner kórsetti. Jalpy, ol favorıtterdiń qatarynda bolýǵa tolyq laıyq.
Muz ústindegi bıde qazaqstandyq juptar medal úshin basty úmitkerler qatarynda emes. Degenmen, Azııada bul baǵdarlamada álemdik deńgeıde úzdik atanǵan sportshylar joq. Bul kútpegen nátıjelerge jol ashýy múmkin.
Deı turǵanmen, belgili azııalyq juptar arasynda Hanna Lım/Tsıýan E (Ońtústik Koreıa), Mısato Komatsýbara/Tım Koleto (Japonııa), Chen Sıtszy/Sın Tszıanın (Qytaı), ıÝtana Eshıda/Masaıa Morıta (Japonııa) bar.
Jalpy, Qazaqstan Qysqy Azııa oıyndarynda eki medalǵa qol jetkizýge qaýqarly. Árıne, bul ońaı tapsyrma emes, biraq shynaıy. Eń bastysy, sportshylar óz baǵdarlamalaryn qateliksiz oryndaýy kerek, óıtkeni mánerlep syrǵanaý – nátıjeni boljap bilýge kelmeıtin sport túri.
Eske salsaq, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady.
QR Týrızm jáne sport mınıstrliginiń habarlaýynsha, Qazaqstannan 139 sportshy el namysyn qorǵaıdy.
Osyǵan deıin qysqy Azııa oıyndary tarıhynda Qazaqstan quramasy short-trekten eshqashan altyn medal jeńip almaǵany týraly jazǵan edik.