Aq Azıadanyń jeńimpazy, jaraqat alsa da synnan súrinbeı ótken Denıs Ten ózin qoldaǵan barsha qazaqstandyq jankúıerlerge alǵys bildirdi
ASTANA. 4 aqpan. QazAqparat /Gúlmıra Álıakparova/ - 7-Qysqy Azııa oıyndarynyń jeńimpazy, mánerlep syrǵanaýshy Denıs Ten barsha qazaqstandyq jankúıerlerge qoldaý bildirgenderi úshin aq júregimen aqtaryla alǵys aıtty.
Jeńisinen keıin óz pikirimen bólisken D.Ten, jarys alańynda otandastarynyń kórsetken qoldaýy ózine jaqsy áser etip, boıyna jiger quıǵandyǵyn aıtty.
«Ómirimde alǵash ret óz elimde Qazaqstannyń namysyn qorǵaǵanyma asa qýanyshtymyn jáne kórsetken ónerime rızamyn. Sondyqtan osynda otyrǵan jáne teledıdar aldyndaǵy qazaqstandyq jankúıerlerime sheksiz alǵysymdy aıtamyn. Kishkentaı qupııamdy ashaıyn. Men bul jarystarda azdaǵan jaraqatpen óner kórsettim. Sońǵy aptalarda bar kúshimmen jattyǵa almadym. Sondyqtan bul jarystar men úshin naǵyz kúres boldy. Bul maýsym men úshin jalpy alǵanda ońaıǵa soǵyp jatqan joq. Sebebi men basqa qurylyqta jattyǵa bastadym. Qaıtalap óteıin, búgin óz Otanymda alǵash ret jarys alańyna shyqtym. Men úshin bul úlken qurmet jáne qolymnan kelgendi jasadym. Qazir kóz jasymdy áreń ustap turmyn», - dedi tolqyp.
