Aq Azıada-2011 oıyndarynyń qurmetine poshta markalary shyǵaryldy
ASTANA. 21 jeltoqsan. QazAqparat /Jasulan Amanbaıuly/ - Búgin Astanada "Qazposhta" AQ "Sport" serııasy boıynsha, 2011 jyly Astana men Almatyda ótetin qysqy Azıada oıyndarynyń qurmetine arnap tórt túrli poshta markalaryn aınalymǵa engizdi.
Markalardyń aınalymǵa engizý saltanatyn búgin QR Týrızm jáne sport mınıstrliginde "Qazposhta" AQ basqarýshy dırektory Andreı Vagner men VII qysqy Azııa oıyndaryn uıymdastyrý komıtetiniń Atqarýshy dırektsııasynyń birinshi vıtse-prezıdenti Aıbek Qapaqov ótkizdi.
Markalardyń nomınaly ár túrli. Máselen, «Tuǵyrdan sekirý» jáne «Mánerlep syrǵanaý» degen atpen basylǵan poshtalyq belgiler - 240 teńge, al «VII qysqy Azııa oıyndarynyń emblemasy» jáne «Frıstaıl» markalary 190 teńge dep belgilengen. Olardyń ólshemi - 28h40 mm, árbiriniń taralymy - 50 myń dana. Paraqtaǵy sany 8 danadan, perforatsııasy ırektelgen, tórt boıaýly ofsetti baspa, sýretshisi - Danııar Muhamedjanov. Poshta markasymen qatar alǵashqy kúnniń hatqaltasy jáne arnaıy poshta mórtabany jasaldy.
«Qazposhta» aktsıonerlik qoǵamy osynaý mańyzdy oqıǵadan tys qalmaı, poshta markalary men fılatelıstik belgilerdi shyǵarý arqyly, el úshin eleýli bolyp tabylatyn sharaǵa óziniń qoldaýyn kórsetip keledi»,- dedi.A. Qapaqov.
«1994 jyldan beri ulttyq poshta operatory «Sport» serııasy boıynsha, Álemdegi eń eleýli sporttyq jarystardyń qurmetine, otandyq sportshylardyń jeńisine arnalǵan 43 poshta markasyn shyǵarǵan. Sonyń ishinde V. Smırnovtyń altyn medali, Atlanta, Lıllehamer, Solt-Leık sıtı, Týrın, Vankýver, Afıny, Beıjiń Olımpıadalary, FIFA uıymyna 100 jyl, Qazaqstannyń Olımpıada chempıondary, OAR-daǵy fýtboldan álem chempıonaty syndy markalar bar. Atalǵan markalar fılatelısterdiń arasynda úlken qyzyǵýshylyqqa ıe bolady dep senemin»,-dep túıindedi óz sózin ol.
