Aq Azıada - 2011 bıletterine suranys joǵary bolmaq
ASTANA. Qyrkúıektiń 27-si. QazAqparat /Jasulan Amanbaıuly/ - Aq Azıada - 2011 bıletterine suranys joǵary bolady.
Búgin astanada ótken baspasóz máslıhatynda Týrızm jáne sport mınıstriniń keńesshisi, 7-shi qysqy Azııa oıyndaryn uıymdastyrý komıtetiniń atqarýshy dırektsııasy» AQ-nyń vıtse-prezıdenti Evgenıı Nıkıtınskıı osyndaı senimdilik bildirdi.
«Bıletterge suranys óte joǵary bolady. Bizdiń pikirimizshe, Qysqy oıyndardyń ashylý jáne jabylý rásimderi, konkı tebý, erler arasynda shaıbaly hokkeı jáne ádettegideı mánerlep syrǵanaý asa úlken qyzyǵýshylyqqa ıe bolady», deıdi ol.
Onyń aıtýynsha, bıletter qarasha aıynyń jáne jeltoqsan aılarynyń orta kezinde satylymǵa shyǵady. Olardy kassalarda jáne ınternet arqyly tapsyrys jasap satyp alýǵa bolady.
Bılet baǵasy naqty belgilengen joq. Biraq onyń quny sheteldikter men qazaqstandyqtar úshin biryńǵaı etip qoıylady. Sonymen qatar qaltaly azamattar úshin VIP-bıletter usynylmaq.
«Bılet baǵasynyń tujyrymdamasy VIP-bıletterdiń bolýyn eskeredi. Al kópshilikke arnalǵan bıletterdiń quny birdeı etip qoıylady. Bıletterdiń baǵasy áli belgilengen joq. Sondyqtan men naqty aıta almaımyn. Degenmen jaı bıletter men VIP-bıletteriniń baǵa aıyrmashylyǵy 30 paıyz deńgeıinde», deıdi E.Nıkıtınskıı.
