Aq aıýlar muzdy alańnyń azaıýy saldarynan teńiz qustaryn aýlaýǵa kóshti
ASTANA. QazAqparat - Frants-Iosıf jeri arhıpelagyn mekendeıtin, Qyzyl kitapqa engen aq aıýlardyń tirshilik keshýin muzdy alań kóleminiń azaıýy keri áserin tıgizip otyr.
Olar ıtbalyqtardy aýlaý qıyndyǵy týyndaǵandyqtan teńiz qustaryna kóshti. Bul týraly "Rýsskaıa Arktıka" ulttyq saıabaǵy dırektorynyń ǵylymı jumystar boıynsha orynbasary Marııa Gavrılo málim etti.
Onyń sózine qaraǵanda, kóktemgi-jazǵy maýsymda zertteýshiler sol mańaıdan 130-dan astam aıýdy baıqaǵan. Onyń ishinde qonjyqtar da bar. "Ańǵarǵanymyz aıýlar teńiz qustaryn aýlaýǵa kóshken", - dedi Gavrılo.
Ǵalymdar muny sońǵy jyldary Arktıkada jaz mezgilinde muzdy jabyn aýmaǵynyń azaıýymen baılanystyryp otyr. Óıtkeni negizgi azyǵyn - ıtbalyqtardy aıýlar muzdan aýlaıdy.
