AITV-ny juqtyrý 30 jasqa deıingi jastar arasynda kóbeıip keledi

Bul týraly búgin jýrnalısterge arnalǵan semınar-trenıng barysynda aıtyldy.

Astana qalalyq JITS-tiń aldyn alý jáne oǵan qarsy kúres ortalyǵynyń dárigeri Erik Ábdrahmanovtyń aıtýynsha, 2013 jyldyń 1 qańtaryna deıin Astanada AITV-ny juqtyrýdyń 582 oqıǵasy tirkeldi. Ótken jyl ishinde jańadan - 99, 2013 jyldyń qańtar aıynda 15 oqıǵa anyqtaldy. Statıstıkaǵa súıensek, ınfektsııany juqtyrý jaǵdaılary 30 jasqa deıingi jastar arasynda jıi kezdese bastady. Máselen, jas erekshelikteri boıynsha alatyn bolsaq, 2012 jyly anyqtalǵan barlyq oqıǵalardyń 47,5 paıyzy (2011 j. - 35 paıyz) - 20-29 jas aralyǵyndaǵy, 35,4 paıyzy (42,3) - 30-39 jas aralyǵyndaǵy, 13,1 paıyzy (13,4) - 40-49 jas, 2,0 paıyzy (3,1) - 15-19 jas jáne 1,0 paıyzy (3,1) - 50-59 jas aralyǵyndaǵy adamdardyń úlesinde.

Juqpaǵa shaldyqqandardyń jartysynan kóbin jynystyq qatynas serigin jıi aýystyratyndar, jynystyq qatynastar qyzmetin usynatyndar, nashaqorlar jáne bas bostandyǵynan aıyrý mekemelerinde otyrǵandar quraıdy. Degenmen, AITV-ny juqtyrý oqıǵalary turaqty jumystary bar, áleýmettik jaǵdaılary jaqsy, joǵary bilimdi azamattardyń arasynda da tirkelýde. Semınar-trenıngtiń maqsaty - buqaralyq aqparat quraldaryn tarta otyryp, AITV/JITS-ti aldyn alý is-sharalaryn qarqyndy ete túsý, bilimdi, biraq sonymen bir mezgilde, AITV/JITS týraly az biletin azamattarǵa aqparattardy usyný.

Tirkelgen oqıǵalar sanynyń artýyn JITS Ortalyǵynyń mamandary juqpany anyqtaýǵa jáne onyń aldyn alýǵa baǵyttalǵan qarqyndy jumystarmen baılanystyrady. Ortalyq mamandary ótken jyly jalpy orta bilim berý mektepterinde, arnaıy bilim berý mekemelerinde jáne joǵary oqý oryndarynda - 817, Astana qalasynyń aýmaǵyndaǵy bas bostandyǵynan aıyrý mekemelerinde 12 is-shara uıymdastyrdy. Sondaı-aq ónerkásiptik kásiporyndar, monshalar, oıyn-saýyq mekemeleri, sulýlyq salondary, qonaq úı keshenderi, dúkender, shashtarazdar men meıramhanalar nazardan tys qalmady.

Turǵyndar óz densaýlyǵyna beı-jaı qaramaıtynyn JITS ortalyǵynyń - www.astana-aids.kz saıtyna kirýshiler sanynan (aıyna 3200-5000 adam) jáne olardan kelip túsetin suraqtardan kórýge bolady. Saýaldardy AITV-ny juqtyrǵandardan jáne bul vırýstan ózin saqtaǵysy keletinder qoıýda. Sondaı-aq Ortalyqta qoldaý kórsetý qyzmetiniń telefon jelisi - (87172) 38 15 85 jáne senim telefony - (87172) 380702, 380464 jumys isteıdi.

Semınar-trenıng barysynda jýrnalısterge arnap press-týr uıymdastyryldy. Onyń barysynda JITS ortalyǵy janynda jumys isteıtin Dostyq kabınetiniń, Senim beketiniń, Psıho-áleýmettik kómek kórsetý jáne AITV-ǵa anonımdi túrde testiden ótý kabınetiniń, zamanaýı zerthananyń qyzmeti tanystyryldy.

Máselen, Dostyq kabınetine kúnine 10-15 adam keledi. 2012 jyly onyń kómegine 1067 adam júginip, olardyń barlyǵy em aldy.

Sondaı-aq Ortalyq dárigeri Qarlyǵash Kúzembaeva AITV-ny juqtyrǵan jáne JITS-ke shaldyqqan azamattardyń, sonyń ishinde balalardyń Qazaqstan Respýblıkasynyń Zańymen qamtamasyz etilgen quqyqtary; VICh juqpasyn anyqtaý tekserisinen bas tartqan QR aýmaǵynda turatyn shet el azamattaryna memleket qoldanatyn sharalar; QR aýmaǵynda dıplomatııalyq artyqshylyqtardy jáne ımmýnıtetti paıdalanatyn shet el memleketteriniń dıplomattary men ókilderin VICh juqpasyn anyqtaý tekserisinen ótkizý tártibi; AITV/JITS týraly aqparat berý barysynda BAQ ókilderiniń etıkany jáne adamgershilik qasıetterdi ustaný máseleleri jáne t. b. týraly aıtyp berdi.