AITV-men ómir súretin adamdarǵa qoǵamnyń kózqarasyn jaqsartý qajet – Smaıylov
«Ótken jyly elimizde ımmýn tapshylyǵy vırýsymen aýyratyn naýqastarǵa arnalǵan áleýmettik jobalarǵa nebári 7 úkimettik emes uıym tartyldy. Bul – óte az. Sondyqtan, Densaýlyq saqtaý mınıstrligi ákimdiktermen birlesip, osy jumystarǵa úkimettik emes uıymdardy tartý úshin áleýmettik granttar men tapsyrystar sanyn keńeıtýi kerek», - dedi Álıhan Smaıylov.
Úkimet basshysynyń atap ótýinshe, Adamnyń ımmýn tapshylyǵy vırýsy belgileri jáne juqtyrý joldary týraly adamdarǵa keńinen aqparat berý qajet.
«Sońǵy ýaqytta mundaı jumys ókinishke oraı, nasharlap ketti. Adamdardyń kópshiligi saqtyq sharalaryna salǵyrt qaraýda. Sonymen qatar qaýipti vırýspen ómir súretin adamdarǵa qoǵamnyń kózqarasyn jaqsartý qajet. Densaýlyq saqtaý jáne Aqparat mınıstrlikteri ákimdiktermen birlesip, aqparattyq materıaldar, rolıkter, áleýmettik jeliler arqyly halyq arasynda túsindirý jumystaryn kúsheıtýi qajet», - dedi Premer-Mınıstr.
Sonymen qatar Úkimet basshysy sanıtarııalyq-epıdemıologııalyq qyzmetter tarapynan halyqqa medıtsınalyq qyzmetterdi, sol sııaqty juqtyrý qaýpi bar basqa da em-sharalar kórsetý kezinde ınfektsııalyq qaýipsizdikke qatań baqylaý jasalýy kerektigin basa aıtty.
