AITV ınfektsııasyn ádeıi juqtyrǵan Temirtaý turǵyny 6 jylǵa sottaldy

Temirtaýda aýyr derti baryn bile tura, qasaqana áıeldermen qorǵalmaǵan baılanysqa túsip, olarǵa AITV-ınfektsııasyn juqtyrǵan er adamdy sottaý protsessi ótti.

Sot ony 6,5 jylǵa bas bostandyǵynan aıyryp, jazasyn qaýipsizdigi ortasha túrmede ótkizý týraly úkim shyǵardy, dep habarlaıdy QazAqparat tilshisi.

Qylmystyq isti Temirtaý qalalyq soty jabyq sot otyrysynda qarady. Aıypkerge 5 jyldan 10 jylǵa deıin bas bostandyǵynan aıyrý túrindegi jazany kózdeıtin QR QK-niń 118-baby 3-bóligi (aýrýyn bile tura, basqa adamǵa AITV juqtyrǵan) boıynsha aıyp taǵyldy.

Esterińizge sala keteıik, qyrkúıek aıynyń basynda eki áıeldi AITV-ınfektsııasymen qasaqana juqtyrǵan er adam ustaldy.

Er adam aýrýdy taratqany úshin qylmystyq jaýapqa tartylatyny týraly eskertilgenine qaramastan, basqa adamǵa AITV/JITS juqtyrǵany úshin aıyptalyp, qamaýǵa alynǵan edi.

Sotta er adamnyń kinási onyń ishinara moıyndaýymen, jábirlenýshilerdiń aıǵaqtarymen jáne is materıaldarymen rastaldy.

Prokýror aıyptalýshyǵa 6 jyl 8 aı merzimge bas bostandyǵynan aıyrý jazasyn taǵaıyndaýdy surady. Al qorǵaýshy tarap bas bostandyǵynan aıyrýdan ózge jaza taǵaıyndaýdy ótindi.

«Jaza taǵaıyndaý kezinde sot aıyptalýshynyń kámeletke tolmaǵan balasynyń bolýy kináni jeńildetetin derek dep tanydy. Sottyń úkimimen S. ortasha qaýipsizdik qylmystyq-atqarý júıesi mekemelerinde jazasyn óteı otyryp, 6 jyl 6 aıǵa bas bostandyǵynan aıyryldy. Sot úkimi zańdy kúshine engen joq», - dep habarlady Temirtaý qalalyq sotynyń baspasóz qyzmeti.