AITV ınfektsııasyn birneshe adamǵa juqtyrǵan astanalyq sottaldy
ASTANA. QazAqparat - Astana soty birneshe adamǵa adamnyń ımmýndyq tapshylyǵy vırýsyn (AITV) juqtyrǵan er azamatty bas bostandyǵynan aıyrdy, dep habarlaıdy «QazAqparat» tilshisi.
Qalalyq sottyń baspasóz qyzmetinen málim etkendeı, úkimge sáıkes, sottalýshy QR Qylmystyq kodeksiniń 118-baby 3-bóligimen («Adamnyń ımmýndyq tapshylyǵy vırýsyn AITV/JITS juqtyrý») bes jylǵa bas bostandyǵynan aıyryldy.
Sot sheshimine qatysty apellıatsııalyq shaǵym joldanǵan. Qazirgi kezde atalǵan is qalalyq sottyń tıisti ınstantsııasynda qarastyrylyp jatyr.
Eske sala keteıik, elorda turǵyny adamdarǵa aýrýdy qasaqana juqtyrdy dep kútiktelip otyr. Elorda Info saıtynyń jazýynsha, ol ınfektsııany úsh adamǵa juqtyrdy dep aıyptalýda. Biraq kinásyn moıyndap otyrǵan joq.
«AITV ınfektsııasy anyqtalǵanda, dáriger bul týraly patsıentke habarlaıdy. Áńgimelesý barysynda naýqas bul ınfektsııany sanaly túrde eshkimge juqtyrmaıtyny jáne aýrýdy taratpaıtyny týraly qujatqa qol qoıady. Eger ol aýrýyn bireýge ádeıi juqtyrsa, oǵan qatysty qylmystyq is qozǵalady», - dep keltiredi saıt JITS-tyń aldyn alý jáne oǵan qarsy kúres ortalyǵynyń bas dárigeri Sábıt Ábdiraıymovtiń sózin.
Atap ótilgendeı, ádette, AITV-ny juqtyryp alǵan adamdar isti sotqa deıin jetkizbeıdi.
«Kóptegen adamdar sotqa barmaıdy, jarııaly bolýdan, otbasynan aıyrylyp qalýdan qorqady, óz balalaryna aýyr tıe me dep qorqady», - deıdi dáriger.
