Aitu platformasy qarjy sektorynda qaýipsiz arnaǵa aınalýy múmkin
ASTANA. KAZINFORM – Qazirgi ýaqytta naryq qatysýshylarymen birge otandyq Aitu platformasyn banktik emes qarjy uıymdary men qarjylyq qyzmetterdi tutynýshylar arasyndaǵy ózara is-qımyldyń qosymsha qorǵalǵan arnasy retinde paıdalaný bastamasy talqylanyp jatyr.
Atalǵan másele agenttik tarapynan qarjylyq qyzmetter kórsetý barysynda alaıaqtyq áreketterdiń ósýi aıasynda aqparattyq qaýipsizdikti kúsheıtý, onyń ishinde derbes derekterdi qorǵaýdy qamtamasyz etý qajettiligine baılanysty qarastyrylyp jatyr. Sonymen qatar, bul bastama qarjy uıymdary men qyzmet tutynýshylary arasyndaǵy baılanys arnalarynyń standarttalýyna baǵyttalǵan.
— Aitu platformasynyń tehnıkalyq arhıtektýrasy barlyq server men derekterdiń Qazaqstannyń qorǵalǵan kontýry ishinde fızıkalyq turǵyda ornalasýynyń arqasynda sheteldik messendjerlerde joq tıisti qaýipsizdik deńgeıin qamtamasyz etedi. Bul qarjylyq trafıkti ustap qalý jáne derbes derekterdiń transshekaralyq taralý táýekelderin joıady. Árbir tranzaktsııanyń qaýipsizdigi shıfrlaýdyń (end-to-end) ádisin qoldaný arqyly qamtamasyz etiledi, munda qol jetkizý kiltteri tek paıdalanýshylardyń qurylǵylarynda saqtalady, bul server nemese provaıder tarapynan hat almasýdy oqýdy múmkin emes etedi, — delingen Qarjy naryǵyn retteý jáne damytý agenttigi taratqan habarlamada.
Mindetti bıometrııalyq sáıkestendirý men bulttyq ETsQ-ny qamtıtyn Aitu Passport júıesin qoldaný jiberýshi men alýshyny zańdy turǵydan máni bar túrde verıfıkatsııalaýdy qamtamasyz etip, fıshıng pen tulǵany qoldan jasaý qaýipterin is júzinde joqqa shyǵarady. Ashyq API-ınterfeıster men bıznes-kabınetterdi paıdalaný tipti shaǵyn qarjy uıymdaryna da daıyn ulttyq ınfraqurylymǵa súıene otyryp, eń joǵary aqparattyq qaýipsizdik standarttaryna sáıkes óz júıelerin biriktirýge nemese ázirlengen servısti az shyǵynmen paıdalanýǵa múmkindik beredi.
Qarjy naryǵynda Aitu platformasyn paıdalaný bastamasy messendjerdiń barlyq artyqshylyǵy men naryq qatysýshylarynyń múddelerin eskere otyryp, jan-jaqty pysyqtalatyn bolady.
Aıta ketelik Aitu ekojúıesin aı saıyn qansha adam paıdalanatyny týraly jazǵan edik.
