AITU messendjeri men Smart Data Ukimet: Tsıfrlyq shtab mańyzdy bastamalardy bekitti
ASTANA. KAZINFORM — Premer-mınıstr Oljas Bektenov Memleket basshysynyń jasandy ıntellektini damytý máseleleri jónindegi keńeste bergen tapsyrmalaryn júzege asyrý boıynsha Tsıfrlyq shtab otyrysyn ótkizdi, dep habarlaıdy Úkimettiń baspasóz qyzmeti.
Kún tártibinde tórt másele qaraldy. Jıynda Qazaqstan Respýblıkasynyń tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev baıandama jasady.
Tsıfrlyq shtabtyń sheshimimen:
— memlekettik organdardyń aqparattyq júıelerin ıntegratsııalaýdyń keshendi jospary bekitildi;
— jasandy ıntellekt derekter massıvterimen jumys isteý reglamenti jáne ony júzege asyrý jospary bekitildi;
— Smart Data Ukimet boıynsha memlekettik derekterdi biriktirý boıynsha jumystardy aıaqtaý merzimderi anyqtaldy. Jańa heshteý ádisin qoldanatyn ıntegratsııa bıylǵy 1 qyrkúıeginde aıaqtalýy kerek, al barlyq derekter osy jyldyń 1 jeltoqsanyna deıin platformaǵa berilýi kerek;
— osy jyldyń 15 qyrkúıegine deıin memlekettik organdar qyzmetkerleriniń AITU ulttyq messendjerine kóshýi.
Premer-mınıstr qabyldanǵan qujattardy sapaly ári ýaqtyly iske asyrýdyń mańyzdylyǵyn atap ótti.
— Memleket basshysy Qazaqstan Eýrazııadaǵy tsıfrlyq habqa aınalýy tıis degen maqsatty alǵa qoıyp otyr. Naqty mindetter belgilendi. Búgingi tańda Tsıfrlyq shtab barlyq memlekettik organ men uıymdar úshin mindetti sheshimder qabyldady. Nátıje aqparattyq qaýipsizdikti jaqsartýǵa jáne memlekettik apparattyń tıimdiligin arttyrýǵa baǵyttalǵan, — dedi Oljas Bektenov.
Memlekettik organdardyń aqparattyq júıelerin ıntegratsııalaýdyń keshendi jospary negizinde 224 aqparattyq quramdas alań qurylady. Bul ıntegratsııa úshin eńbek shyǵyndaryn azaıtýǵa, fýnktsıonaldyq jáne statıstıkalyq aıyrmashylyqtar turǵysynan aqparattyq júıelerdiń qaıtalaný máselesin sheshýge múmkindik beredi. Búgingi tańda «elektrondyq úkimet» aıasynda memlekettik organdar men kvazımemlekettik sektor uıymdarynyń 355-ten astam aqparattyq júıeleri men veb-resýrstary jumys isteıdi.
Jasandy ıntellekt derekter massıvterimen jumys isteý erejesi jáne ony júzege asyrý jospary bekitildi. Qujat JI tehnologııalaryn damytý úshin derekter qoryn qalyptastyrý máselesin qarastyrady. Bul erejeler aqparatty jınaý, tekserý jáne qurylymdaýdyń biryńǵaı standarttaryn qarastyrady.
Smart Data Ukimet platformasynda memlekettik derbestendirilmegen derekterdi toptaý boıynsha jumys sheńberinde Smart Data Ukimet-ke mindetti túrde kóshirýge jatatyn derekter bazalarynyń tizimi bekitildi.
Jıynda AITU ulttyq messendjerin keń aýqymda engizý máselesi qaraldy. Onyń pılottyq jumysy Tsıfrlyq damý, ınnovatsııalar jáne aeroǵarysh ónerkásibi mınıstrliginde kórsetildi, endi atalǵan qyzmet memlekettik organdar men kvazımemlekettik sektor uıymdarynyń barlyǵyna engiziledi.
Osyǵan deıin elimizde tsıfrlyq shtabtyń jedel top quramy bekitilgeni belgili boldy.