Aitu men eGov-qa tegin qoljetimdilik zańmen bekitilmek
ASTANA. KAZINFORM — Májilis telekommýnıkatsııa naryǵy men derekterdi óńdeý ortalyqtaryn damytýǵa qatysty zań jobasyn ekinshi oqylymda maquldady.
Zań jobasy boıynsha Ekonomıkalyq reforma jáne óńirlik damý komıtetiniń múshesi Rýslan Qojasbaev baıandama jasady.
Onyń aıtýynsha, qujat baılanys ınfraqurylymyn jetildirýge, telekommýnıkatsııa salasyna jańa tehnologııalardy engizýge jáne halyqqa baılanys qyzmetteriniń qoljetimdiligin arttyrýǵa baǵyttalǵan.
Zań jobasynda aýyldyq jáne shalǵaı eldi mekenderdi joǵary jyldamdyqtaǵy ınternetpen jáne sapaly uıaly baılanyspen qamtý kózdelgen. Sonymen birge telefon alaıaqtyǵyn anyqtaý jáne onyń aldyn alý baǵytyndaǵy aqparattyq-taldamalyq jumysty kúsheıtý sharalary qarastyrylǵan.
— Zań jobasyn talqylaý barysynda depýtattar áleýmettik jáne memlekettik mańyzy bar Aitu, eGov, eGov Business jáne eOtinish qosymshalaryna táýlik boıy tegin qoljetimdilik berý jóninde túzetýler engizdi, — dedi Rýslan Qojasbaev.
Sondaı-aq qujatta telemedıtsına, turǵyn úı-kommýnaldyq sharýashylyq, smart city jáne aýyl sharýashylyǵy sekildi salalarda qoldanylatyn Zattar ınterneti jelilerin zańnamalyq turǵyda retteý máselesi qamtylǵan.
Budan bólek, baılanys nysandaryn salý úshin jer telimderin bólý rásimin jeńildetý jáne uıaly baılanys qurylǵylaryn tirkeý júıesin jetildirý usynylǵan.
— Uıaly baılanys qurylǵylaryn verıfıkatsııalaý qyzmetin memlekettik monopolııaǵa berý tutynýshylarǵa qurylǵy sapasyna kepildik jasap, naryqtaǵy ashyqtyqty arttyrýǵa ári telefon urlyǵynyń azaıýyna yqpal etedi. Bul norma 2027 jylǵy 1 shildeden bastap kúshine enedi, — dedi depýtat.
Sonymen qatar baılanys operatorlaryna jyl saıynǵy qarjylyq eseptiligin resmı ınternet-resýrstarynda jarııalaý mindeti júkteledi.
Aıta keteıik, buǵan deıin 2027 jylǵa qaraı Qazaqstannyń iri qalalarynda 5G jelisiniń qamtylý deńgeıi 75%-ǵa jetetini habarlanǵan edi.
