Aitu — memlekettik qyzmet úshin: halyqqa WhatsApp pen Telegram-dy qoldanýǵa shekteý joq

ASTANA. KAZINFORM — Tsıfrlyq damý mınıstrligi jeke maqsatta sheteldik servısterdi qoldanýǵa esh tyıym salynbaıtynyn habarlaıdy.

Vedomstvo málimetinshe, BAQ-ta taralyp jatqan WhatsApp, Telegram jáne basqa da sheteldik messendjerlerdi qoldanýǵa tyıym salynady degen aqparat shyndyqqa janaspaıdy. 

— Aitu messendjerin engizý bastamasy tek ortalyq jáne jergilikti memlekettik organdarǵa, sondaı-aq kvazımemlekettik sektor uıymdaryna qyzmettik kommýnıkatsııa úshin ǵana usynylady. Ol memlekettik qyzmetkerler tek jumys barysynda paıdalanatyn aqparatpen qaýipsiz almasýdy qamtamasyz etý maqsatynda qoldanylady. Maqsaty — aqparattyq qaýipsizdik deńgeıin arttyrý jáne qorǵalǵan tsıfrlyq ortaǵa kóshý, — dep túsindirdi mınıstrlik.

Aitu qyzmettik hat almasýdyń, jumys chattarynyń, jedel habarlamalardyń jáne memlekettik tsıfrlyq platformalarmen ózara árekettesýdiń negizgi quralyna aınalady. Onyń basty artyqshylyǵy — barlyq serverler Qazaqstan aýmaǵynda ornalasqan, bul derekterdi qorǵaý talaptaryna sáıkes keledi jáne júıeni memlekettik organdar úshin senimdirek etedi.

Aitu sheteldik messendjerlerdi azamattardyń jeke ómirinde almastyrmaıdy jáne oǵan «kedergi keltirmeıdi», ol tek memlekettik sektordaǵy jumys protsesteri úshin qorǵalǵan arnany qamtamasyz etedi.

Budan buryn Premer-mınıstr Oljas Bektenov Memleket basshysynyń jasandy ıntellektini damytý máseleleri jónindegi keńeste bergen tapsyrmalaryn júzege asyrý boıynsha Tsıfrlyq shtab otyrysyn ótkizdi. Onda osy jyldyń 15 qyrkúıegine deıin memlekettik organdar qyzmetkerleriniń AITU ulttyq messendjerine kóshetini belgili boldy.