Aitu, eGov, eOtinish: endi azamattar ınternet balansy bolmasa da qyzmet ala alady
ASTANA. KAZINFORM — Tsıfrlyq shtabtyń sheshimine sáıkes azamattarǵa balans nól nemese teris bolǵan jaǵdaıda da eGov, Aitu jáne eOtinish qyzmetterine qoljetimdilik qamtamasyz etiledi, dep habarlaıdy Úkimettiń baspasóz qyzmeti.
Premer-mınıstr Oljas Bektenovtiń tóraǵalyǵymen ótken Tsıfrlyq shtabta Memleket basshysynyń tsıfrlandyrý salasyndaǵy alǵa qoıǵan mindetterin júzege asyrý baǵytynda birqatar sheshim qabyldandy.
Tsıfrlyq shtab sheshimimen:
● bıylǵy 15 qyrkúıekten bastap Aitu, eGov, eGov Business, eOtinish qyzmetteri men aqparattyq júıelerine qoljetimdilikti qamtamasyz etý úshin nóldik tarıfteýdi qoldanýdy iske qosý;
● osy jyldyń 20 qyrkúıegine deıin Smart Bridge platformasynda kommertsııalyq IT-sheshimderdi qyzmettermen kedergisiz ıntegratsııalaý múmkindigin qamtamasyz etý;
● Qaztech platformasynda ІT sheshimderiniń shekti quny boıynsha qoıylatyn talaptardy qospaǵanda, iri jobalardy júzege asyrý úshin tıisti quqyqtyq aktilerge ózgerister engizý;
● jyl sońyna deıin jasandy ıntellekt arqyly memlekettik qyzmetterdi tsıfrlandyrýdy qamtamasyz etý.
— Aitu, eGov, eGov Business, eOtinish qyzmetteri men aqparattyq júıeleri úshin nóldik tarıfteýdi paıdalaný azamattardyń mobıldi shotyndaǵy balans nól nemese teris bolǵan jaǵdaıda memlekettik resýrstarǵa kepildik beretin qoljetimdilikti qamtamasyz etedi. Mundaı qadam Halyqqa qyzmet kórsetý ortalyqtaryna túsetin júktemeni aıtarlyqtaı azaıtýǵa múmkindik beredi jáne digital by default formatyna kóshýdiń mańyzdy kezeńine aınalady, — dep atap ótti vedomstvo.
Birqatar shet elderde osyǵan uqsas tetikter qazirdiń ózinde bar. Estonııada X-Road jáne e-Services platformalaryna tegin qoljetimdilik qamtamasyz etilgen, Sıngapýrda telekommýnıkatsııa operatorlary SingPass, Gov.sg, MyInfo qyzmetterine nóldik trafık usynady.
Smart Bridge qosa alǵanda, jeke ІT sheshimderin memlekettik qyzmettermen ıntegratsııalaý ınnovatsııalardy engizý jáne derbes derekterdi qorǵaý jónindegi barlyq talapty saqtaı otyryp, bıznes pen memleket arasyndaǵy ózara is-qımyldy nyǵaıtý úshin jańa múmkindikter ashady.
Búgingi tańda platforma arqyly 14,6 myńnan astam ótinim berildi. Aýqymdy jobalardy júzege asyrý úshin Qaztech platformasynda IT-sheshimderdiń quny jáne avtomattandyrylǵan fýnktsııalarynyń sany boıynsha shekteýler alynyp tastalady. Buryn bir ónimdi ázirleý 15 myń aılyq eseptik kórsetkishten aspaýy kerek bolatyn, merzimi 6 aımen shekteldi, avtomattandyrylǵan fýnktsııalardyń sany nebary 3-eý ǵana edi. Endi jańa tásil kedergilerdi joıady, ýqymdy jáne keshendi sheshimderdi jedel ázirleýge múmkindik beredi, otandyq tsıfrlyq tehnologııalardyń qoldaný aıasyn keńeıtý úshin jaǵdaı jasaıdy.
Aıta keteıik, qazir 1 408 memlekettik qyzmettiń 368-i tolyq avtomattandyrylǵan, taǵy 984-in odan ári tsıfrlandyra túsýge bolady, al 56 qyzmet proaktıvti formatqa kóshirilgen. Jasandy ıntellektini qoldana otyryp, memlekettik qyzmetterdi tsıfrlandyrý jónindegi sheshim proaktıvti formatty qoldaný arqyly olardy kórsetý sapasyn arttyrýǵa múmkindik beredi.
Osydan buryn Tsıfrlyq damý mınıstrligi jeke maqsatta sheteldik servısterdi qoldanýǵa esh tyıym salynbaıtynyn habarlaǵan edi. Aitu messendjerin engizý bastamasy tek ortalyq jáne jergilikti memlekettik organdarǵa, sondaı-aq kvazımemlekettik sektor uıymdaryna qyzmettik kommýnıkatsııa úshin ǵana usynylady.