Airspan korporatsııasy elimizde telekommýnıkatsııalyq jabdyqtar shyǵaratyn óndiris oshaǵyn qurýǵa nıetti
ASTANA. QazAqparat - QR Investıtsııalar jáne damý mınıstri Jeńis Qasymbek óziniń Feısbýktegi paraqshasynda Davosta ótip jatqan Dúnıejúzilik ekonomıkalyq forým aıasynda Qazaqstanǵa ınvestıtsııaǵa quıýǵa nıeti bar birqatar shetel ınvestorymen kezdeskenin jazdy, dep habarlaıdy QazAqparat.
«Búgin Davosta ótip jatqan Dúnıejúzilik ekonomıkalyq forým aıasynda elimizge ınvestıtsııa quıýǵa talpynys bildirip otyrǵan birqatar iri sheteldik ınvestorlarmen kezdesý ótkizdim. Atap aıtsaq, munaı men agrohımııa salasyndaǵy óndiriske nemistiń "Evonik" hımııalyq transulttyq kompanııasy qyzyǵýshylyq tanytsa, aǵylshyn-amerıkan-ızraıldik Airspan korporatsııasy elimizde telekommýnıkatsııalyq jabdyqtardy shyǵaratyn óndiris oshaǵyn qurýǵa nıet bildirip otyr. Al taý-ken kesheninen bastap joǵary tehnologııalarǵa deıingi túrli salalarda jumys istep júrgen úndistandyq SUN Group holdıngi geologııa men jer qoınaýyn ıgerý salasyna ınvestıtsııa quımaq, temirjolǵa qajetti tehnıka shyǵaratyn iri qytaılyq korporatsııa da QTJ-men kelissózder júrgizip, óndiris ornyn qurýdy usyndy. Sondaı-aq, Eýropalyq qaıta qurý jáne damý bankiniń basshylyǵymen kezdesip, elimizde júzege asyryp jatqan birneshe jobalaryn talqyladyq», - dep jazdy Jeńis Qasymbek.
Aıta keteıik, buǵan deıin QR Investıtsııalar jáne damý mınıstri Jeńis Qasymbek Davosta ótip jatqan Dúnıejúzilik ekonomıkalyq forým barysynda Qazaqstannyń kólik haby men ınvestıtsııalyq múmkindikterin tanystyratyndyǵyn habarlaǵan edik .
