Airbus ushaqtaryn Qytaıda jasalǵan robottar qurastyrady
ASTANA. KAZINFORM – Qytaıdyń robototehnıka salasyndaǵy jetekshi ázirleýshileriniń biri UBTECH eýropalyq aeroǵarysh kontserni Airbus-pen ónerkásiptik robottardy jetkizý týraly kelisim jasasty, dep habarlaıdy Sınhýa.
Áriptestik aıasynda Airbus ushaqtardy qurastyrýdyń óndiristik tsıklderinde qoldaný múmkindikterin zerdeleý úshin Walker S2 modelin satyp aldy. 2025 jylǵy qarashada jappaı óndirisi bastalǵan bul modeldiń boıy 176 santımetrdi quraıdy jáne qýat kózderin ózdiginen aýystyrý fýnktsııasymen jabdyqtalǵan.
UBTECH kompanııasynyń málimetinshe, 2026 jyly óndiristik qýaty jylyna 10 myńnan astam ónerkásiptik gýmanoıd robot shyǵarýǵa jetýi tıis.
Al ótken jyldyń qorytyndysy boıynsha kompanııanyń osyndaı tehnologııalyq sheshimderge qatysty tapsyrystar portfeli shamamen 200 mıllıon AQSh dollaryn quraǵan.
2025 jyly UBTECH amerıkalyq jartylaı ótkizgishter óndirýshisi Texas Instruments kompanııasymen strategııalyq áriptestik ornatty. Airbus-pen yntymaqtastyq qytaılyq ázirleýshige sheteldegi qatysý aıasyn bes negizgi ındýstrııalyq segmentke deıin keńeıtýge múmkindik beredi. Olardyń qatarynda avıatsııa ónerkásibi, avtokólik óndirisi, mıkroelektronıka, turmystyq tehnıka jáne ıntellektýaldy logıstıka bar.
Buǵan deıin Hyundai óz zaýyttaryna 30 myń adamtektes robot ornalastyratyny habarlanǵan bolatyn.