Airbus Frantsııadan Aýstralııaǵa 22 saǵattyq toqtaýsyz reısti synaqtan ótkizbek
ASTANA. KAZINFORM – Airbus kompanııasy 24 shildede jyldaǵy eń aýqymdy synaq saparlarynyń birin ótkizedi. Jańa Airbus A350-1000ULR ushaǵy Frantsııadan Aýstralııaǵa shamamen 22 saǵat boıy jerge qonbaı ushyp ótpek, dep habarlaıdy Bild.
Airbus ókilderiniń Executive Traveller portalyna málimdeýinshe, jańa Airbus A350-1000ULR ushaǵy Týlýza qalasynan Melbýrnǵa deıin aıaldamasyz ushady. Uzyndyǵy shamamen 17 myń shaqyrym bolatyn jáne 22 saǵatqa sozylatyn baǵyt Qantas áýe kompanııasynyń «Tańsári» (Project Sunrise) dep atalatyn kóp mıllıardtyq jobasy úshin mańyzdy synaq bolmaq.
Bul synaq kommertsııalyq jolaýshylar ushaǵynyń aralyq qonbaı táýlikke jýyq ýaqyt boıy áýede bola alatynyn kórsetýi tıis. Qantas bul jobany 2017 jyldan beri júzege asyrýdy kózdep keledi.
Kompanııa Aýstralııadan Eýropa men Soltústik Amerıkaǵa janarmaı quıýsyz, aıaldamasyz jáne qaıta otyrmaı tikeleı reıster ashýdy josparlap otyr. Eger joba sátti júzege assa, kelesi jyldyń qazan aıynan bastap jolaýshylar alǵash ret Sıdneıden Londonǵa jáne Nıý-Iorkke toqtaýsyz usha alady.
Mundaı reısterdi oryndaý úshin tapsyrys berilgen A350-1000ULR ushaqtaryna birqatar mańyzdy ózgeris engiziledi. Ushaqtyń quıryq bóligine syıymdylyǵy 20 myń lıtr bolatyn qosymsha janarmaı bagy ornatylady. Sonymen qatar janarmaı júıesi men borttaǵy asúıdiń salqyndatý júıesi jańǵyrtylady.
A350 ushaǵynyń jańa modıfıkatsııasy paıdalanýǵa berilmes buryn Eýropalyq avıatsııalyq qaýipsizdik agenttiginiń sertıfıkattaý rásiminen ótýi qajet.
Eske sala ketsek, Air Astana ushaqtarynda ınternet qashan paıda bolatynyn jazdyq.
Al Bishkektegi ushaq apatyna baılanysty áýe kompanııasy lıtsenzııasynan aıyryldy.
