Airbus amerıkalyq Boeing-ten kem qalmaý úshin bankten rekordtyq somada nesıe almaq
ASTANA. KAZINFORM – Eýropalyq ınvestıtsııalyq bank (EIB) Airbus kontsernine azamattyq avıatsııa, ǵarysh jáne qorǵanys salalaryndaǵy zertteýler men ázirlemelerdi qarjylandyrý úshin 3 mlrd eýro kóleminde nesıe beredi. Taraptar Brıýsselde alǵashqy 1 mlrd eýrolyq transh týraly kelisimge qol qoıdy. Bul týraly DW jazdy.
EIB málimetinshe, bul – bank tarıhyndaǵy eń iri nesıe. Qarajat Germanııa, Frantsııa jáne Ispanııadaǵy zertteý jáne tájirıbelik-konstrýktorlyq jumystardy keńeıtýge jumsalady. Qarjy Airbus-tyń azamattyq avıatsııa, ǵarysh jáne qorǵanys baǵyttaryndaǵy jobalaryn damytýǵa baǵyttalady.
Bank málimdemesinde nesıeniń ıkemdi sharttary men uzaq merzimdi óteý kestesi Airbus-qa álemdik naryqtaǵy básekege qabilettiligin saqtaýǵa múmkindik beretini aıtylǵan.
EIB prezıdenti Nadıa Kalvıno Eýropanyń halyqaralyq básekelestik jaǵdaıynda jyldam ári aýqymdy sheshim qabyldaı alatynyn atap ótti.
– EIB tarıhyndaǵy buryn-sońdy bolmaǵan bul qarjylandyrý Airbus kompanııasyna uzaq merzimdi zertteýlerge, ázirlemelerge jáne ınnovatsııalarǵa ınvestıtsııa salýǵa qajetti qarjy men ıkemdilikti qamtamasyz etedi. Bul azamattyq avıatsııaǵa ǵana emes, qaýipsizdik pen qorǵanys salalaryna da qatysty, – dedi EIB vıtse-prezıdenti Ambrýaz Faıol AFP agenttigine.
Onyń aıtýynsha, bólingen qarajattyń bir bóligi ushaqtardyń parnıktik gaz shyǵaryndylaryn azaıtýǵa baǵyttalǵan jobalardy qoldaýǵa jumsalady.
Eýropalyq odaq Qytaı men AQSh tarapynan kúsheıip kele jatqan básekelestik jaǵdaıynda eýropalyq ónerkásiptiń pozıtsııasyn nyǵaıtýdy kózdep otyr. Airbus – álemdegi eń iri ushaq óndirýshi kompanııa, onyń negizgi básekelesi – amerıkalyq Boeing korporatsııasy.
Aıta keteıik, Qazaqstannyń Airbus áýe kemelerin baǵdarlamalyq jańartý jumysyn tolyq aıaqtaǵany habarlanǵan.
Sondaı-aq Airbus ushaqtaryn Qytaıda jasalǵan robottar qurastyrtynyn jazdyq.
