Airbus A320 ushaǵy apatynan qaza tapqan 3 qazaqstandyq - bir januıanyń adamdary - QR SІM
ASTANA. QazAqparat - 24 naýryzda Frantsııanyń ońtústiginde Airbus A320 ushaǵynyń apatqa ushyraýy saldarynan qaza bolǵan qazaqstandyqtardyń máıitin elge jetkizý máselesi pysyqtalyp jatyr. Bul týraly búgin Astanada QR SІM baspasóz hatshysy Nurjan Aıtmahanov málim etti.
«Apatty bolǵan ushaqtyń bortynda úsh qazaqstandyq azamattyń bolǵany aıqyndalyp otyr. Atap aıtqanda, qaza bolǵandardyń arasynda Erbol Imanqulov (1965 jyly dúnıege kelgen), Aıjan Isenǵalıeva (1966 jyly dúnıege kelgen) jáne Ádil Imanqulov (1989 jyly dúnıege kelgen) esimdi elimizdiń azamattary bolǵany rastaldy. Úsheýi de bir otbasynyń adamdary. Sonymen qatar Germanııa bılik ókilderiniń habarlaýynsha, sol bortta taǵy da bir qazaqstandyq Elena Bles esimdi azamatsha bolýy múmkin. Qazirgi kezde onyń Qazaqstannyń azamaty nemese azamaty emes ekendigi tıisti memlekettik organdar tarapynan tekserilip jatyr», - dedi baspasóz hatshysy.
Onyń sózine qaraǵanda, qazirgi sátte elimizdiń Germanııadaǵy jáne Frantsııadaǵy elshilikteri osy memleketterdiń bılik ókilderimen baılanysyp, qaza bolǵan azamattardyń máıitterin aıqyndaý men olardy elge jetkizý máselesin pysyqtaýda.
Sonymen qatar N. Aıtmahanov qaza bolǵandar ShQO týmasy ekenin atap ótti. Ázirge olardyń Eýropaǵa qandaı maqsatpen barǵandyǵy belgisiz.
