Airbus A320 ushaǵy apatqa ushyraǵan jerden ekinshi «qara jáshik» tabyldy
ASTANA. QazAqparat - Frantsııanyń Alpi taýlarynda apatqa ushyraǵan Germanwings áýekompanııasyna tıesili Airbus A320 ushaǵynyń ekinshi «qara jáshigi» tabyldy.
Bul týraly Marsel prokýrory Brıs Robenge silteme jasaı otyryp bbc.co.uk habarlaıdy.
Kabınadaǵy ushqyshtardyń áńgimesi jazylǵan alǵashqy «qara jáshik» apat oryn alǵan soń kóp uzamaı-aq tabylǵan bolatyn. Ondaǵy jazbalar birinshi ushqysh kabınadan shyǵyp ketken kezde ekinshi ushqysh - Andreas Lıýbıts esikti myqtap jaýyp, Barselonadan Dıýsseldorfqa bet alǵan ushaqty taý shatqaldaryna baǵyttaǵanyn rastaıdy, dep jazady 24.kz .
Al germanııalyq izkesýshiler qaıǵyly jaǵdaı oryn alǵanǵa deıin Lıýbıtstiń ózin-ózi óltirý joldaryn izdep jáne ushqysh kabınasynyń esigin asha almastaı etip jabýdyń tásilderin zerttegenin aıtqan bolatyn. Olar muny onyń planshetti kompıýterin teksergen soń anyqtaǵan. Negizi ekinshi «qara jáshik» ushaqtyń tehnıkalyq júıesin qadaǵalap otyrady.
