Airbus A320 tarıhtaǵy eń kóp satylǵan reaktıvti ushaq boldy
ASTANA. KAZINFORM – Airbus kompanııasy avıatsııa tarıhynda mańyzdy beleske jetti. A320 áýe kemeleri Boeing 737-den ozyp, álem tarıhyndaǵy eń kóp satylǵan reaktıvti jolaýshylar ushaǵy atandy, dep habarlaıdy Kazinform agenttiginiń tilshisi.
Bul týraly Reuters agenttigi brıtandyq Cirium konsaltıng kompanııasynyń esebine silteme jasap habarlady.
Rekord A320neo ushaǵy Saýd Arabııasynyń Flynas áýe kompanııasyna jetkizilgennen keıin ornatyldy. Osylaısha 1988 jyly alǵashqy reısinen beri A320 ushaqtarynyń jalpy jetkizilim sany 12 260-qa jetti. Bul Airbus kompanııasynyń azamattyq avıatsııa naryǵynda Boeing-ten alǵash ret uzaqmerzimdi basymdyqty tartyp alǵan sáti.
A320 men Boeing 737 qazirgi jolaýshylar avıatsııasynyń negizin qalady. Álem boıynsha satylǵan jolaýshylar ushaqtarynyń 25 myńnan astamy osy eki úlgige tıesili. Orta tap ókilderiniń sanynyń artýy men Azııadaǵy bıýdjettik áýe kompanııalarynyń jelisiniń keńeıýi tar fıýzelıajdy laınerlerge suranysty odan ári arttyryp otyr.
1980-jyldardyń ortasynda alǵash ret tanystyrylǵan A320 — Eýropanyń alǵashqy iri kommertsııalyq ushaǵy ári «fly-by-wire» dep atalatyn tolyq tsıfrlyq basqarý júıesimen jabdyqtalǵan alǵashqy laıner boldy. Bul tehnologııa keıin búkil sala úshin standartqa aınaldy. Bastapqyda kúmán men saıası kelispeýshilikter bolǵanymen, Airbus táýekeli aqtalyp, A320 tarıhtaǵy eń ámbebap jáne kóp óndirilgen ushaqtardyń biri atandy.
Boeing óz kezeginde 737 ushaǵynyń jańa nusqalaryn — Next Generation jáne MAX modelderin shyǵardy. Alaıda sońǵy jyldardaǵy óndiristik qıyndyqtar men qaýipsizdik máseleleri kompanııanyń jetkizý qarqynyn baıaýlatty.
Sarapshylardyń pikirinshe, aldaǵy ýaqytta Airbus pen Boeing arasyndaǵy aıyrmashylyq azaıa qoımaıdy, óıtkeni eki kompanııa da jańa modelder shyǵarýdan góri óndiris tıimdiligin jáne ekologııalyq turaqtylyǵyn arttyrýǵa basymdyq berip otyr.
A320 ushaǵynyń tanymaldyǵynyń artýy avıatsııa tarıhyndaǵy sımvoldyq kezeńge aınaldy — ol kúmán týdyrǵan eýropalyq jobadan álemdegi eń kóp óndiriletin laınerge deıingi joldy kórsetti.
Aıta keteıik, Qazaqstanda «Embraer» ushaqtaryna tehnıkalyq qyzmet kórsetetin servıstik ortalyq ashylýy múmkin ekenin jazǵan edik.