Air India Boeing janarmaı júıesinen eshqandaı aqaý tappady
ASTANA.KAZINFORM – Air India kompanııasy Boeing 787-8 ushaqtaryndaǵy janarmaı júıesi mehanızmin tekserýdi aıaqtady jáne olardan eshqandaı aqaý tappady, dep habarlaıdy NDTV.
Úndistannyń Azamattyq avıatsııa bas dırektsııasy (DGCA) dúısenbi kúni 21 shildege deıin keıbir Boeing ushaqtarynyń janarmaı baqylaý qosqyshtaryn tekserýge nusqaý bergennen keıin tolyqtaı tekseris júrgizildi.
Áýe apattaryn tergeý bıýrosynyń (AIIB) esebine sáıkes, Ahmedabadtaǵy Boeing 787-8 Dreamliner apatqa ushyraýy kezinde janarmaı júıesi qosqyshtary ushaq kóterilgennen keıin kóp uzamaı tómen bıiktikte 1 sekýndtyq ıntervalmen birinen soń biri «sóndirý» kúıine aýysqan.
– Demalys kúnderi bizdiń ınjenerlik top barlyq Boeing 787 ushaǵyndaǵy janarmaı selektorynyń qulpyn profılaktıkalyq tekserýdi bastady. Tekserý aıaqtaldy jáne eshqandaı másele anyqtalǵan joq, - dedi Air India ókili.
Aıta keteıik, buǵan deıin bortynda 240 adamy bar Air India ushaǵy apatqa ushyraǵan edi.